ନବରଙ୍ଗପୁର: ରାଜ୍ୟରେ କୋରୋନା ସଂକ୍ରମଣର ମାତ୍ରା ବଢି ଚାଲିଥିବା ବେଳେ ଗଞ୍ଜାମ ଜିଲ୍ଲାରେ ଭୟାବହ ହେବାରେ ଲାଗିଛି ସ୍ଥିତି । ଏମିତିରେ ଗଞ୍ଜାମରେ ସ୍ବାସ୍ଥ୍ୟ ସେବା ସୁଧାରିବାକୁ ଯାଇ ନବରଙ୍ଗପୁର, କୋରାପୁଟ, ମାଲକାନଗିରି ଓ କନ୍ଧମାଳ ସମେତ 6ଟି ଆଦିବାସୀ ଅଧ୍ୟୁଷିତ ଜିଲ୍ଲାରୁ 100 ଜଣ ଡାକ୍ତରଙ୍କୁ ବଦଳି କରାଯାଇଛି । ଯାହା କୋରୋନା ମହାମାରୀ ସମୟରେ ଆଦିବାସୀ ଜନତାଙ୍କ ପ୍ରତି ବିଶ୍ବାସ ଘାତକତା ଓ ଅନ୍ୟାୟ ବୋଲି ଅଭିଯୋଗ କରିଛନ୍ତି ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ।
ଆଦିବାସୀ ଅଧ୍ୟୁଷିତ ଅଞ୍ଚଳମାନଙ୍କରେ ଡାକ୍ତରଙ୍କ ଅଭାବ ରହିଥିବା ବେଳେ ସ୍ବାସ୍ଥ୍ୟସେବାର ସୁବିଧା ପହଞ୍ଚାଇବା ଅତି ଜରୁରୀ ବିଷୟ । ଏମିତିରେ ଆଦିବାସୀଙ୍କ କଥା ଭୁଲି ନିଜ ନିର୍ବାଚନ ମଣ୍ଡଳୀରେ ଜନତାଙ୍କ ସ୍ବାର୍ଥ ପାଇଁ ରାଜ୍ୟ ସରକାର ନେଇଥିବା ନିଷ୍ପତ୍ତିକୁ ପ୍ରଦୀପ ବିରୋଧ କରିଛନ୍ତି । ରାଜ୍ୟର ଅନ୍ୟ ସମସ୍ତ ଜିଲ୍ଲାରୁ ଡାକ୍ତରଙ୍କୁ ବଦଳି ନକରି କେବଳ ଆଦିବାସୀ ଅଧ୍ୟୁଷିତ ଜିଲ୍ଲାରୁ କାହିଁକି ଏତେ ସଂଖ୍ୟକ ଡାକ୍ତରଙ୍କୁ ବଦଳି କରାଯାଉଛି ବୋଲି ମଧ୍ୟ ପ୍ରଦୀପ ପ୍ରଶ୍ନ କରିଥିଲେ । ଏପରି କରି ରାଜ୍ୟ ସରକାର ଆଞ୍ଚଳିକ ବୈଷମ୍ୟ ଭାବ ସୃଷ୍ଟି କରୁଥିବା ମଧ୍ୟ ପ୍ରଦୀପ ଅଭିଯୋଗ କରିଥିଲେ ।
ନିଜ ସୁବିଧା ଓ ଅଧିକାର ପାଇବା ପାଇଁ ଆଦିବାସୀ ଜନତାମାନେ ରାଜ୍ୟ ସରକାରଙ୍କ ଉପରେ ବିଶ୍ବାସ ଦେଖାଇଥିବା ବେଳେ ରାଜ୍ୟ ସରକାରଙ୍କ ନିଷ୍ପତ୍ତି ସେଇ ନିରୀହ ଜନତାଙ୍କ ପାଇଁ ବିଶ୍ବାସଘାତକ ବୋଲି ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ପ୍ରଦୀପ ଆକ୍ଷେପ କରିଛନ୍ତି । ସେ ରାଜ୍ୟ ସରକାରଙ୍କୁ ଖୋଲାଖୋଲି ଚେତାବନୀ ଦେଇ ଏହା ମଧ୍ୟ କହିଛନ୍ତି କି ଆଗାମୀ ଜୁଲାଇ 31 ସୁଦ୍ଧା ଯଦି ସମ୍ପୃକ୍ତ ଅଞ୍ଚଳର ଡାକ୍ତରମାନଙ୍କ ବଦଳି ଆଦେଶ ସ୍ଥଗିତ ନ କରାଯାଏ ତେବେ ସେହି 6ଟି ଜିଲ୍ଲାରେ କଂଗ୍ରେସ ଆନ୍ଦୋଳନ ଜୋରଦାର କରିବ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
