ନବରଙ୍ଗପୁର: ଜୀବିକା ନିର୍ବାହ କରିବା ସହ ପରିବାର ପ୍ରତିପୋଷଣ ଆଳରେ ଅନେକ ସମୟରେ ବାଜିରେ ଲାଗୁଛି କୌଳିକ ବୃତ୍ତି । କେବେ କୌଳିକ ବୃତ୍ତିକୁ ବଞ୍ଚାଇବାକୁ ଗଲେ ପେଟ ପୁରୁନି ତ ଆଉ କେତେବେଳେ ପେଟ ପୋଷିବାକୁ ଯାଇ ହାତଛଡା କରିବାକୁ ପଡୁଛି କୌଳିକ ବୃତ୍ତି । ଏମିତିରେ ଲକଡାଉନ ସମୟରେ ନିଜ ପେଶାର ମାନ୍ଦାବସ୍ଥାକୁ ସ୍ବୀକାର କରି ପୁଣି କୌଳିକ ବୃତ୍ତିରେ ମନ ବଳାଇଛନ୍ତି ନବରଙ୍ଗପୁର ସହର ବାଦାମ ସାହିର ମୃତ୍ୟୁଞ୍ଜୟ ମହାରଣା । ପେଶାରେ ସେ ଜଣେ ଆଇନଜୀବୀ ହୋଇଥିବା ବେଳେ ଗତ 22 ବର୍ଷ ହେବ ଜଣେ ସରକାରୀ ଓକିଲ ଭାବେ ସେ କର୍ତ୍ତବ୍ୟ ସମ୍ପାଦନ କରିଚାଲିଛନ୍ତି । ହେଲେ କୋରୋନା ମହାମାରୀ ପାଇଁ ଲାଗୁ ହୋଇଥିବା କଟକଣାରେ ପେଶା ପ୍ରଭାବିତ ହେବାରୁ ସେ ପରିବାର ସହ ଆରମ୍ଭ କରିଛନ୍ତି କାଠ କାମ ।
ଜାତିରେ ବିଶ୍ବକର୍ମା ବୋଲାଉଥିବା ମହାରଣା ପରିବାରରେ ଜନ୍ମ ନେଇଥିବା ମୃତ୍ୟୁଞ୍ଜୟଙ୍କର ଛୁଆଟି ଦିନରୁ କାଠ କାମ ପ୍ରତି ରହିଥିଲା ବେଶ ଆଗ୍ରହ । ବାପା ଓ ଭାଇଙ୍କ ସହଯୋଗରେ ସେ ବଢେଇ କାମ ଶିଖିବା ପରେ ସମାଜସେବା ପାଇଁ ମନ ବଳାଇ ନିଜ ପରିଶ୍ରମର ଅର୍ଥରୁ ଆରମ୍ଭ କରିଥିଲେ ଆଇନ ପଢା । ପରେ ଜଣେ ସଫଳ ଆଇନଜୀବୀ ଭାବେ ସେ ଜିଲ୍ଲା ଓ ଦୌରା ନ୍ୟାୟାଧିଶଙ୍କ କାର୍ଯ୍ୟାଳୟରେ ଗତ 22 ବର୍ଷ ହେବ ନିରବଚ୍ଛିନ୍ନ ସେବା ଯୋଗାଇ ଆସୁଛନ୍ତି । ହେଲେ ଏବେ କୋରୋନା ମହାମାରୀ ସମୟରେ ବ୍ୟବସାୟରେ ବାଧା ସୃଷ୍ଟି ହେବାରୁ ସେ ବିନା କୌଣସି ଦ୍ବିଧାରେ ବାପା ଓ ଭାଇଙ୍କ ସହ ହାତ ମିଳାଇ କରୁଛନ୍ତି ବଢେଇ କାମ । ଯାହାକୁ ନେଇ ସ୍ଥାନୀୟ ଅଞ୍ଚଳରେ ସେ ସୃଷ୍ଟି କରିପାରିଛନ୍ତି ଏକ ନିଆରା ଉଦାହରଣ । ତେବେ ଆଗକୁ ପରିସ୍ଥିତି ସୁଧୁରିଲେ ସେ ପୁଣି ଓକିଲାତି ଆରମ୍ଭ କରିବେ ବୋଲି କହନ୍ତି ମୃତ୍ୟୁଞ୍ଜୟ ।
ଆର୍ଥିକ ଅଭାବ ସମୟରେ କୌଣସି କାର୍ଯ୍ୟକୁ ହେୟ ମନେ ନ କରି ସ୍ବାଭିମାନର ସହ ବଞ୍ଚି ନୂଆ ଦୃଷ୍ଟାନ୍ତ ସୃଷ୍ଟି କରିଛନ୍ତି ମୃତ୍ୟୁଞ୍ଜୟ । ଏମିତିରେ ଅସୁବିଧା ସମୟରେ ବିଚଳିତ ନ ହୋଇ ପରିସ୍ଥିତିକୁ ସ୍ବୀକାର କରିବା ସହ ନିଜ କୌଳିକ ବୃତ୍ତି ପ୍ରତି ଥିବା ଆଦର ଓ ଭଲ ପାଇବାକୁ ସାଉଣ୍ଟି ସେ ଅନ୍ୟ ସହଯୋଗୀଙ୍କ ପାଇଁ ସାଜିଛନ୍ତି ପ୍ରେରଣାର ଉତ୍ସ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
