ବରଗଡ: ସ୍ଥାନୀୟ ପଦ୍ମପୁର ଉପଖଣ୍ଡ ପାଇକମାଳ ବ୍ଲକ ଅଞ୍ଚଳରେ ଲାଗି ରହିଛି ପ୍ରବଳ ବର୍ଷା । ପ୍ରଭାବରେ ଖପସିବାଞ୍ଜି ଗ୍ରାମର ବହୁ ଚାଷ ଜମି ବର୍ଷା ପାଣି ଭିତରେ ବୁଡି ପୋଖରୀରେ ପରିଣତ ହୋଇଛି । ଫଳରେ ନଷ୍ଟ ହୋଇଛି ଶହ ଶହ ଏକର ଚାଷ ଜମିର ଫସଲ । ଗତ ଦୁଇ ଦିନ ହେବ ଲଗାତାର ବର୍ଷା କାରଣରୁ ପାଇକମାଳ ଅଞ୍ଚଳରେ ଲୋକଙ୍କ ଜନଜୀବନ ମଧ୍ୟ ଅସ୍ତବ୍ୟସ୍ତ ହୋଇପଡିଛି ।
ତେବେ ଲଘୁଚାପ ଜନିତ ଲଗାଣ ବର୍ଷା କାରଣରୁ ଜିଲ୍ଲାର ପଦ୍ମପୁର ଓ ପାଇକମାଳ ଅଞ୍ଚଳରେ ଗତ ଦୁଇ ଦିନ ହେଲା ସର୍ବାଧିକ ବର୍ଷା ରେକର୍ଡ କରାଯାଇଛି । ସୋମବାର ତୃତୀୟ ଦିନରେ ମଧ୍ୟ ପାଇକମାଳ ଅଞ୍ଚଳରେ ବର୍ଷା ଲାଗି ରହିଥିବା ବେଳେ ପାହାଡ ପାଦ ଅଞ୍ଚଳ ଗ୍ରାମମାନଙ୍କରେ ପ୍ରବଳ ପାଣି ମାଡି ଯାଇ ବନ୍ୟା ପରିସ୍ଥିତି ଉପୁଜିଛି । ସେପଟେ ଗ୍ରାମର ରାସ୍ତା ପାଣି ଭିତରେ ବୁଡି ରହିଥିବା ବେଳେ ଲୋକଙ୍କ ଯାତାୟାତ ମଧ୍ୟ ବାଧାପ୍ରାପ୍ତ ହୋଇପଡିଛି । ରାସ୍ତାର ଉଭୟ ପାର୍ଶ୍ଵରେ ରହିଥିବା ଚାଷ ଜମିଗୁଡିକ ବର୍ଷାପାଣିରେ ବୁଡି ରହିଛି ।
ଏମିତିରେ ବହୁ ଗରିବ ଚାଷୀମାନଙ୍କର ଫସଲ ସମ୍ପୂର୍ଣ୍ଣ ନଷ୍ଟ ହୋଇପଡିଥିବା ବେଳେ ଆଉ ସେହି ଜମିମାନଙ୍କରେ ପୁନଃ ଚାଷ କରାଯିବା ଅସମ୍ଭବ ହୋଇପଡିଛି । ଅନ୍ୟପଟେ ରାସ୍ତା ଘାଟ ସବୁ ବନ୍ୟା ପାଣିରେ ଖାଇ ଯାଇଥିବା ବେଳେ ଖପସିବାଞ୍ଜି ଗ୍ରାମ ବାହ୍ୟ ଜଗତଠାରୁ ବିଚ୍ଛିନ୍ନ ହୋଇପଡିଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
