ନବରଙ୍ଗପୁର: ଗତକିଛି ଦିନ ଧରି ଲାଇମ ଲାଇଟରେ ରହିଛନ୍ତି ଡାବୁଗାଁ ବିଧାୟକ ମନୋହର ରନ୍ଧାରୀ । ନିଜର ପ୍ରଶଂସନୀୟ କାର୍ଯ୍ୟ ପାଇଁ ସବୁ ମହଲେ ତାଙ୍କୁ ସ୍ବାଗତ କରାଯାଉଛି । ଏଥର କିନ୍ତୁ ବିଧାୟକ ଟିକେ ଆକ୍ସନ ମୁଡକୁ ଆସିଯାଇଛନ୍ତି । ଯାହାଫଳରେ ସାମ୍ନାକୁ ଆସିଛି ଏକ ବଡ ଅନିୟମିତତାର ଦୃଶ୍ୟ ।
ଘଟଣାଟି ଏପରିକି, ଛାତ୍ରଛାତ୍ରୀଙ୍କ ମଧ୍ୟାହ୍ନ ଭୋଜନ ବଣ୍ଟନରେ ଅବହେଳା । ମଧ୍ୟାହ୍ନ ଭୋଜନ ନଖାଇ ଉପାସରେ ରହିବା । ଏହାସହ ସ୍କୁଲକୁ ବିଧାୟକଙ୍କ ଅଚାନକ ପରିଦର୍ଶନ ଓ ତଦନ୍ତ ପରେ ସାମ୍ନାକୁ ଆସିଛି ପ୍ରକୃତ ସତ୍ୟ ଘଟଣା । ଏଭଳି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଧନଶୁଲି ଆଶ୍ରମ ବିଦ୍ୟାଳୟରେ ।
ମଧ୍ୟାହ୍ନ ସମୟ ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ଅନ୍ତର୍ଗତ ଧନସୁଲି ଆଶ୍ରମ ବିଦ୍ୟାଳୟକୁ ହଠାତ ପରିଦର୍ଶନ ରେ ଯାଇଥିଲେ ଡାବୁଗାଁ ବିଧାୟକ ମନୋହର ରନ୍ଧାରୀ । ସ୍କୁଲରେ ଥିବା ଅନ୍ତେବାସୀ ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଗ୍ରହଣ କରିଛନ୍ତି ନା ନାହିଁ ମଧ୍ୟାହ୍ନ ଭୋଜନରେ କଣ ଦିଆଯାଇଥିଲା ସେ ସମ୍ବନ୍ଧରେ ପଚାରିଥିଲେ ବିଧାୟକ । କିନ୍ତୁ ସ୍କୁଲରେ ଥିବା ୬୬ ଜଣ ଛାତ୍ରଛାତ୍ରୀ ଖାଦ୍ୟ ଅଭାବ ଯୋଗୁଁ ମଧ୍ୟାହ୍ନ ଭୋଜନ ଗ୍ରହଣ କରିନଥିବା ପ୍ରକାଶ କରିଥିଲେ । ଯାହା ଶୁଣି ହତବାକ ହୋଇଯାଇଥିଲେ ବିଧାୟକ ।
ବିଧାୟକ ଜାଣିବାକୁ ପାଇଥିଲେ ଯେ ବିଦ୍ୟାଳୟରେ ୪୪୯ ଜଣ ଛାତ୍ରଛାତ୍ରୀ ଅଧ୍ୟୟନ କରୁଥିବା ବେଳେ ୩୦୦ ଜଣ ଛାତ୍ରଛାତ୍ରୀ ହଷ୍ଟେଲରେ ରହୁଛନ୍ତି । ଆଜି ୨୬୦ ଜଣ ଛାତ୍ରଛାତ୍ରୀ ସ୍କୁଲରେ ଉପସ୍ଥିତି ରହିଥିଲେ । ସେଥିମଧ୍ୟରୁ ୧୯୪ ଜଣ ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଗ୍ରହଣ କରିଥିବା ବେଳେ ଭାତ ରହିଥିଲା କିନ୍ତୁ ଡାଲି ଓ ତରକାରୀ ରହିନଥିବାରୁ ୬୬ ଜଣ ଛାତ୍ରଛାତ୍ରୀ ମଧ୍ୟାହ୍ନ ଭୋଜନ ଗ୍ରହଣ କରିନଥିଲେ ।
ସଙ୍ଗେ ସଙ୍ଗେ ସେ ପୁନର୍ବାର ମଧ୍ୟାହ୍ନ ଭୋଜନ ରୋଷେଇ କରି ନିଜେ ରନ୍ଧାଖାଦ୍ୟ ପରଶିଥିଲେ । ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ସ୍କୁଲକୁ ଡକାଇ ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଥିଲେ । ପୂର୍ବରୁ କେବେ ଏଭଳି ଘଟଣା ଘଟିନଥିବା ବେଳେ ଆଜି ହିଁ ଏଭଳି ଘଟଣା ଘଟିଥିବା ସ୍କୁଲ ଛାତ୍ରଛାତ୍ରୀ ମାନେ ପ୍ରକାଶ କରିଛନ୍ତି ।
ଖବର ପାଇ ଘଟଣାସ୍ଥଳକୁ ଜିଲ୍ଲାମଙ୍ଗଳ ଅଧିକାରୀ ପହଞ୍ଚିଥିଲେ । ଏହାସହ କେଉଁ ପରିସ୍ଥିତିରେ ସ୍କୁଲର ଛାତ୍ର ଛାତ୍ରୀଙ୍କୁ ମଧ୍ୟାହ୍ନ ଭୋଜନରୁ ବଞ୍ଚିତ କରାଯାଇଥିଲା ସେ ସମ୍ବନ୍ଧରେ ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବା ବୋଲି ସୂଚନା ଦେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
