ନବରଙ୍ଗପୁର: ଆଧୁନିକତା ଛାପରେ ମଳିନ ପଡିନି ପରମ୍ପରା । ସମାଜ ଯେତେ ସଭ୍ୟ ହେଲେ ବି କେଉଁ ଆବାହନ କାଳରୁ ନବରଙ୍ଗପୁରବାସୀ ବଡ ଧୁମଧାମରେ ପାଳିତ କରି ଆସୁଛନ୍ତି କୃଷି ଭିତ୍ତିକ ପର୍ବ ବାଲିଯାତ୍ରା ।
କୃଷି ଭିତ୍ତିକ ପର୍ବ ବାଲିଯାତ୍ରାକୁ ନେଇ ଉତ୍ସବମୁଖର ହୋଇଉଠିଛି ନବରଙ୍ଗପୁର ଜିଲ୍ଲା । ଡହ ଡହ ଖରାକୁ ଖାତିର୍ ନ କରି ବାଲିଯାତ୍ରାରେ ସାମିଲ ହୋଇଛନ୍ତି ତେନ୍ତୁଳିଖୁଣ୍ଟି ବ୍ଲକର ଶତାଧିକ ଲୋକେ । ବାର ମାସରେ ତେର ଯାତ୍ରା ପରି ଆଦିବାସୀ ବହୁଳ ନବରଙ୍ଗପୁର ଜିଲ୍ଲାରେ ବାଲିଯାତ୍ରାର ରହିଛି ଅନେକ ସ୍ବତନ୍ତ୍ରତା ।
ବାଲିଯାତ୍ରା ପର୍ବରେ ଅନେକ ସୋପାନ ରହିଥାଏ । ସେଥିମଧ୍ୟରୁ ବାଲିରପା ଅନ୍ୟତମ । ବାଲିରପାର ବିଶେଷ୍ବତ ହେଉଛି, ପ୍ରଥମେ ଧରଣୀ ମାଙ୍କ ପ୍ରତିମୂର୍ତ୍ତୀଙ୍କୁ ସ୍ଥାପନା କରାଯାଇ ପୂଜାର୍ଚ୍ଚନା କରାଯାଇଥାଏ । ଏହା ପରେ ଶତାଧିକ ଲୋକେ ବାଲି ଚାଙ୍ଗୁଡା ଧରି ନୃତ୍ୟବାଦ୍ୟରେ ତାଳେ ତାଳେ ନଦୀକୁ ଯାଇ ବାଲି ସଂଗ୍ରହ କରିଥାନ୍ତି । ଏହି ବାଲିକୁ ମନ୍ଦିରରେ ସ୍ଥାପନା କରି ଏଥିରେ ବିହନ ରୋପଣ କରାଯାଇଥାଏ । ଏହି ବିହନ ଗୁଡିକ ଗଜା ହେବା ପରେ ବାଲି ଯାତ୍ରା ଶେଷ ସୋପାନରେ ପହଞ୍ଚି ଥାଏ ।
ବିଶ୍ବାସ ରହିଛି, ବିହନ ଗୁଡିକ ଭଲ ଗଜା ହେଲେ ଭଲ ଚାଷ ହୋଇଥାଏ । ଏହି ଯାତ୍ରା କେତେକ ସ୍ଥାନରେ 12 ବର୍ଷରେ ଥରେ ହେଉଥିବାବେଳେ କିଛି ସ୍ଥାନରେ 3 ବର୍ଷରେ ଥରେ ପାଳନ କରାଯାଏ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
