ନବରଙ୍ଗପୁର: କ୍ୟାସିଅରଙ୍କ ସାହାସ ଯୋଗୁଁ ବିଫଳ ହୋଇଛି ଲୁଟେରାଙ୍କ ବ୍ଲାକ ପଲସରରେ ଟଙ୍କା ଲୁଟ ଉଦ୍ୟମ । ତୁମ୍ବରଲା ଉତ୍କଳ ଗ୍ରାମ୍ୟ ବ୍ୟାଙ୍କ କ୍ୟାସିଅରଙ୍କ ଠାରୁ ୫ ଲକ୍ଷ ଟଙ୍କା ଲୁଟ କରିପାରି ନାହାନ୍ତି ଡ଼କାୟତ ।
ଉତ୍କଳ ଗ୍ରାମ୍ୟ ବ୍ୟାଙ୍କର କ୍ୟାସିଅର ସନ୍ତୋଷ ମହନ୍ତ ନବରଙ୍ଗପୁର SBI ବ୍ୟାଙ୍କରୁ 5 ଲକ୍ଷ ଟଙ୍କା ଉଠାଇ ତୁମ୍ବରଲା ବ୍ୟାଙ୍କ ଫେରିବାକୁ ନବରଙ୍ଗପୁର ରାସ୍ତା ଉପରେ ଠିଆ ହୋଇଥିଲେ । ଏହି ସମୟରେ ସହର ମଧ୍ୟଭାଗରେ କଳା ପଲସର ଗାଡ଼ିରେ ଦୁଇଜଣ ଦୁର୍ବୃତ୍ତ ଆସି ଟଙ୍କା ବ୍ୟାଗକୁ ଝାମ୍ପି ନେବାକୁ ଚେଷ୍ଟା କରିଥିଲେ । କିନ୍ତୁ କ୍ୟାସିଅର ସନ୍ତୋଷ ମହନ୍ତଙ୍କ ସାହାସିକତା କାରଣରୁ ଟଙ୍କା ନେବାରେ ସଫଳ ହୋଇପାରିନଥିଲେ ଦୁର୍ବୃତ୍ତ। ଦୁର୍ବୁତ୍ତ ମାନେ ଟଙ୍କା ବ୍ୟାଗକୁ ଛଡାଇ ନେବାକୁ ଚେଷ୍ଟା କରୁଥିବା ଦୃଶ୍ୟ ନିକଟରେ ଥିବା ଦୋକାନ ଗୁଡିକରେ ଥିବା ସିସିଟିଭି ଗୁଡିକରେ କଏଦ ହୋଇଥିବା ଦେଖିବାକୁ ମିଳିଛି । ଦିନ ଦ୍ବିପହରରେ ନବରଙ୍ଗପୁର ସହର ମଧ୍ୟରେ ଏପରି ଟଙ୍କା ଲୁଟ ଉଦ୍ୟମକୁ ନେଇ ସହରବାସୀ ଆତଙ୍କିତ ହୋଇପଡ଼ିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
