ନବରଙ୍ଗପୁର: ନବରଙ୍ଗପୁରରେ ଡବଲ ମର୍ଡର । ସଇତାନ ବାପାର ନାରକୀୟକାଣ୍ଡ । ସ୍ତ୍ରୀ ସହ ବଚସା ହେବାରୁ ଦୁଇ ବର୍ଷ ଶିଶୁପୁତ୍ରକୁ କଟୁରୀରେ ହାଣି ହତ୍ୟା କଲା ବାପା । ଶିଶୁଟିକ ବଞ୍ଚାଇବା ଯାଇଥିବା ପଡୋଶୀ ବୃଦ୍ଧାଙ୍କ ମଧ୍ୟ ଜୀବନ ଯାଇଛି । ଏଭଳି ଘଟଣା ଘଟିଛି ପାପଡାହାଣ୍ଡି ବ୍ଲକ ମୈଦଲପୁର ପଞ୍ଚାୟତର ଗୁଜୁମାପଦର ଗ୍ରାମରେ । ମୃତ ଦୁଇ ବର୍ଷର ଶିଶୁ ହେଉଛି ବିବି ସାନ୍ତା ଓ ବୃଦ୍ଧ ଜଣଙ୍କ ହେଉଛନ୍ତି ଜନାଏ ସାନ୍ତା । ଏହି ଘଟଣା ନେଇ ମୈଦଲପୁର ଥାନାରେ ମୃତ ଜନାଏର ପୁଅ ସିମାଞ୍ଚଳ ସାନ୍ତା ଥାନାରେ ହତ୍ୟା ଅଭିଯୋଗ କରିଛନ୍ତି l ଅଭିଯୁକ୍ତ ଜଣକ ହେଉଛି ରାଧ ସାନ୍ତା ।
ମିଳିଥିବା ସୂଚନା ଅନୁଯାୟୀ, ରାଧ ଓ ତାର ସ୍ତ୍ରୀ ମାଳତୀ ଘରେ ଥିବା ବେଳେ କୌଣସି କଥାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ଏଥିରେ ରାଗିଯାଇ ମାଳତୀକୁ ମାଡ଼ ମାରିବା ପରେ କଟୁରୀରେ ଆକ୍ରମଣ କରିବାକୁ ଯିବା ବେଳେ ଭୟରେ ସେ କେଉଁ ଆଡେ ଦୌଡି ପଳାଇଥିଲେ । ଶେଷରେ ମାଳତୀକୁ ନପାଇ ତାର ରାଗ ଦୁଇର ପୁଅ ଉପରେ ସୁଝାଇଥିଲା ଅଭିଯୁକ୍ତ । ରାଗକୁ ନିୟନ୍ତ୍ରଣ କରିନପାରି ପୁଅ ବିବି ସାନ୍ତାକୁ ତଳେ କଚାଡି କଟୁରୀରେ ହାଣି ହତ୍ୟା କରିଥିଲା ତାର ବାପା । ଏହା ଦେଖି ପଡୋଶୀ ଘରର ବୃଦ୍ଧା ଜନାଏ ଅଟକାଇବାକୁ ଚେଷ୍ଟା କରିବାରୁ ଅଭିଯୁକ୍ତର ଆକ୍ରମଣରେ ଘଟଣା ସ୍ଥଳରେ ତାଙ୍କର ମୃତ୍ୟୁ ହୋଇଥିଲା l ଏହି ଖବର ପ୍ରଚାର ହେବାରୁ ଗ୍ରାମବାସୀ ଉତ୍ୟକ୍ତ ହୋଇ ରାଧକୁ ମାଡ଼ ମାରି ବାନ୍ଧି ରଖିଥିଲେ l
ଏହା ମଧ୍ୟ ପଢନ୍ତୁ-ଚନ୍ଦକା ଜଳଖିଆ ଦୋକାନୀ ହତ୍ୟାକାଣ୍ଡର ପର୍ଦ୍ଦାଫାସ, ଘୁଗୁନି ପାଇଁ ମର୍ଡର
ଏନେଇ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ରାଧକୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ପ୍ରଥମେ ପାପଡାହାଣ୍ଡି ମେଡିକାଲରେ ଭର୍ତ୍ତି କରିଥିଲା । ପରେ ତାଙ୍କ ଅବସ୍ଥା ଗୁରୁତର ହେବାରୁ ନବରଙ୍ଗପୁର ମେଡିକାଲ ସ୍ଥାନାନ୍ତରିତ କରାଯାଇଥିଲା l ନବରଙ୍ଗପୁରରୁ ଏକ ସାଇଣ୍ଟିଫିକ ଟିମ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି l ଏନେଇ ଥାନାରେ କେଶ ନଂ 154/23ରେ ମାମଲା ରଜୁ ହେବା ସହ ଥାନା ଅଧିକାରୀ ବିପିନ କୁମାର କୁଲଦୀପ ତଦନ୍ତ କରୁଛନ୍ତି l ବର୍ତ୍ତମାନ ସୁଦ୍ଧା ଅଭିଯୁକ୍ତକୁ ପଚାରଉଚରା କରାଯାଇନାହିଁ । ସ୍ବାସ୍ଥ୍ୟାବସ୍ଥାରେ ସୁଧାର ପରେ ପୋଲିସ ପଚରାଉଚରା କରି ଅଭିଯୁକ୍ତକୁ ଗିରଫ କରିବ ।
ଇଟିଭି ଭାରତ, ନବରଙ୍ଗପୁର
