ନବରଙ୍ଗପୁର: ମନ୍ଦିର ପରିସରରେ ଝୁଲୁଛି ପ୍ରେମୀ ଯୁଗଳଙ୍କ ମୃତଦେହ (Couple hanging dead body found) । ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ବଡ଼ଭରଣ୍ଡି ପଞ୍ଚାୟତର ଅଲେଖ ମହିମା ମନ୍ଦିର ପରିସରରେ ଥିବା ରୋଷେଇ ଘର ଭିତରୁ ପ୍ରେମୀ ଯୁଗଳଙ୍କ ଝୁଳନ୍ତା ମୃତଦେହ ଉଦ୍ଧାର ହୋଇଛି । ଯୁବକ ଜଣକ ସ୍ଥାନୀୟ ଜଗଦୀଶ କଲାରଙ୍କ ପୁଅ ପ୍ରଫୁଲ୍ଲ କଲାର ହୋଇଥିବା ଜଣାପଡ଼ିଛି । ମୃତ ଯୁବତୀଙ୍କ ପରିଚୟ ଜଣାପଡ଼ିନାହିଁ ।
ଯୁବତୀଙ୍କ ନିକଟରୁ ଏକ ସୁଇସାଇଡ୍ ନୋଟ ମିଳିଛି । ଯେଉଁଥିରେ ଇଂରାଜୀ ଏବଂ ହିନ୍ଦୀ ଭାଷାରେ 'ମେରେ ପ୍ୟାରେ ପୂର୍ଣିମା, ମେ ଯା ରାହାହୁଁ ଲଭ ୟୁ ମାଆ' ଏବଂ ଏକ ମୋବାଇଲ ନମ୍ବର ଲେଖା ହୋଇଛି । ପାରିପାର୍ଶ୍ବିକ ପରିସ୍ଥିତିକୁ ଦେଖିଲେ ଏହା ଏକ ଆତ୍ମହତ୍ୟା ବୋଲି ଅନୁମାନ କରାଯାଉଛି । ଏହାକୁ ନେଇ ମୃତକଙ୍କ ବାପା କହିଛନ୍ତି, " ପୁଅ ଗାଡ଼ି ଚଳାଏ । କିନ୍ତୁ ଦୀର୍ଘ ଦିନ ଧରି ଘରକୁ ଆସିନଥିଲା । ଉଭୟେ ପରସ୍ପରକୁ ପ୍ରେମ କରୁଥିଲେ ବୋଲି ଜଣାପଡୁଛି ।" ବାପା ମୃତ ଯୁବତୀଙ୍କୁ ଚିହ୍ନି ନଥିବା କହିଛନ୍ତି ।
ଇଟିଭି ଭାରତ, ନବରଙ୍ଗପୁର
