ନାତି ନେଲା ଜେଜେ ମା’ର ଜୀବନ, ହତ୍ୟା ପରେ ନାଳରେ ପୋତି ଦେଲା ମୃତଦେହ

ସାମାନ୍ୟ ବଚସାରୁ ଜେଜେମାର ଜୀବନ ନେଲା ନାତି । ପ୍ରମାଣ ନଷ୍ଟ କରିବା ପାଇଁ ନିଜ ମାଆର ସାହାଯ୍ୟରେ ମୃତଦେହକୁ ପୋତିଦେଇଥିଲା ନାତି । କେଉଁଠି ଘଟିଛି ଏହି ଘଟଣା । ପଢନ୍ତୁ ସମ୍ପୂର୍ଣ୍ଣ ଖବର ।

ନବରଙ୍ଗପୁର: ସାମାନ୍ୟ ବଚସାରୁ ହତ୍ୟାକାଣ୍ଡ । ଜେଜେମାର ଜୀବନ ନେଲା ନାତି । ପ୍ରମାଣ ନଷ୍ଟ କରିବା ପାଇଁ ନିଜ ମାଆର ସାହାଯ୍ୟରେ ମୃତଦେହକୁ ପୋତିଦେଇଥିଲା ନାତି । ଚାରି ଦିନ ଧରି ଖୋଜାଖୋଜି ପରେ ମାଟି ତଳୁ ମିଳିଲା ଗଳିତ ଅବସ୍ଥାରେ ଜେଜେମାର ମୃତଦେହ । ଏଭଳି ଏକ ସମ୍ବେଦନଶୀଳ ଘଟଣା ଘଟିଛି ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ଥାନା ଅନ୍ତର୍ଗତ ଖଣ୍ଡିଆଗୁଡା ଗାଁରେ । ପୋଲିସ ମାଟିତଳୁ ମୃତଦେହ ବାହାର କରି ଘଟଣା ସ୍ଥଳରେ ହିଁ ଡାକ୍ତରୀ ଟିମ ସହ ଘଟଣାସ୍ଥଳରେ ମୃତଦେହକୁ ବ୍ୟବଚ୍ଛେଦ କରିଛି ।

ସୂଚନା ଅନୁଯାୟୀ, ତେନ୍ତୁଳିଖୁଣ୍ଟି ସଦର ପଞ୍ଚାୟତ ଅନ୍ତର୍ଗତ ଖଣ୍ଡିଆଗୁଡା ଗାଁରେ ଚଳିତ ମାସ ୯ ତାରିଖ ଏପରି ହତ୍ୟାକାଣ୍ଡ ଘଟିଥିଲା। ସୋନାଇ ଜାନିଙ୍କ ପରିବାରରେ କୌଣସି ଏକ ଘରୋଇ କାରଣକୁ ନେଇ ବଚସା ହୋଇଥିଲା । ତେବେ ବଚସା ଉଗ୍ର ରୂପ ନେଇଥିଲା ଫଳରେ ନାତି ଜଗବନ୍ଧୁ ଜାନି ନିଜ ଜେଜେମାଙ୍କୁ ଠେଲି ଦେବାରୁ ତଳେ ପଡ଼ି ଘଟଣା ସ୍ଥଳରେ ହିଁ ସୋନାଇ ଜାନିଙ୍କ ମୃତ୍ୟୁ ହୋଇଥିଲା । ଏହାପରେ ନାତି ଜଗବନ୍ଧୁ ଏବଂ ତାର ମାଆ କୁନି ଜାନି ମିଶି ମୃତଦେହକୁ ଲୁଚାଇବାକୁ ଯୋଜନା କରିଥିଲେ । ଘଟଣା ଦିନ ମଧ୍ୟରାତ୍ରରେ ନିଜ ଘର ନିକଟରେ ଥିବା ଏକ ନାଳରେ ସୋନାଇଙ୍କ ମୃତଦେହକୁ ପୋତିଦେଇ ଗାଁ ଛାଡି ପଳାୟନ କରିଥିଲେ ।