ନବରଙ୍ଗପୁର: ଶାଶୂ ପରେ ଶ୍ବଶୁର ପାଲଟିଲେ ଉଦାହରଣ, ବିଧବା ବୋହୂକୁ କରାଇଲେ ବିବାହ । ଅନୁଗୋଳର ତାଳଚେର ପରେ ନବରଙ୍ଗପୁରରେ ଦେଖିବାକୁ ମିଳିଛି ଏଭଳି ଘଟଣା । ତାଳଚେରରେ ଶାଶୂ ନିଜର ବିଧବା ବୋହୂକୁ ଅନ୍ୟତ୍ର ବିବାହ କରାଇବା ଘଟଣା ସାମ୍ନାକୁ ଆସିଥିବାବେଳେ ନବରଙ୍ଗପୁରରେ ଶ୍ବଶୂର ବିଧବା ବୋହୂକୁ ବିବାହ କରାଇ ଉଦାହରଣ ସୃଷ୍ଟି କରିଛନ୍ତି ।
ନବରଙ୍ଗପୁର ଜିଲ୍ଲା କୋଷାଗୁମୁଡା ବ୍ଲକ ଏକୋରି ଗାଁରେ ଦେଖିବାକୁ ମିଳିଛି ଏଭଳି ଘଟଣା । ଏକୋରି ସମିତି ସଭ୍ୟ ତଥା ଶ୍ବଶୂର କମଳଲୋଚନ ମାଝୀ ନିଜ ବିଧବା ବୋହୂ ନୟନା ମାଝୀଙ୍କୁ ପୁଣି ଥରେ ବିବାହ କରାଇଛନ୍ତି । ନିଜେ କନ୍ୟା ଦାନ କରି ତାଙ୍କୁ ଆଉ ଏକ ନୂଆ ଜୀବନ ଦେଇଛନ୍ତି ।
କମଳ ଲୋଚନଙ୍କ ପୁଅ ପୋଲିସ ବିଭାଗରେ ଚାକିରି କରିଥିଲେ । 7 ବର୍ଷ ତଳେ ସେ ବାରିଗୁଡା ଗ୍ରାମର ନଇନାଙ୍କୁ ବିବାହ କରିଥିଲେ । ତାଙ୍କର ପୁଅଟିଏ ମଧ୍ୟ ଅଛି । ତେବେ ଦୂର୍ଘଟଣାରେ ତାଙ୍କର ମୃତ୍ୟୁ ପରେ କମଳଙ୍କୁ ଘାରିଥିଲା ବୋହୂ ଓ ନାତୀର ଚିନ୍ତା । ପରେ ବିଧବା ବୋହୂକୁ ଅନ୍ୟତ୍ର ବିବାହ କରିବା ପାଇଁ ସ୍ଥିର କରି ଜଣେ ସମ୍ପର୍କୀୟ ଯୁବକଙ୍କ ସହ ତାଙ୍କର ବିବାହ କରାଇଛନ୍ତି ।
ଜଣେ ଲୋକପ୍ରତିନିଧି ଭାବେ କମଳ କେବଳ ନିଜ ବୋହୂକୁ ବିବାହ କରାଇ ଉଦାହରଣ ସୃଷ୍ଟି କରିନାହାଁନ୍ତି ଉପାନ୍ତ ଅଞ୍ଚଳରେ ଏପରି କରି ଲୋକଙ୍କ ମଧ୍ୟରେ ସଚେତନତା ବାର୍ତ୍ତା ପହଞ୍ଚାଇଛନ୍ତି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
