ନବରଙ୍ଗପୁର: ଭୋଟରଙ୍କୁ ଆକୃଷ୍ଟ କରିବା ପାଇଁ ପ୍ରାର୍ଥୀମାନେ ଅଭିନବ ଉପାୟରେ ପ୍ରଚାର କରୁଛନ୍ତି । ଏହାରି ମଧ୍ୟରେ ଆଜି(ଶନିବାର) ଜିଲ୍ଲା ଅନ୍ତର୍ଗତ ତେନ୍ତୁଳୀଖୁଣ୍ଟି ବ୍ଲକ ମଞ୍ଚାଗାଁ ପଞ୍ଚାୟତର ବିଜେଡି଼ ସମର୍ଥିତ ସରପଞ୍ଚ ପ୍ରାର୍ଥୀ ଇଞ୍ଜିନିୟର ରାମନାଥ ଜାନି ଅଭିନଵ ଉପାୟରେ ପ୍ରଚାର କରିଛନ୍ତି । ସେ ଜୀଅନ୍ତା ମାଛ ଧରି ପ୍ରଚାର କରୁଥିବା ଦେଖିବାକୁ ମିଳିଛି ।
ଇଞ୍ଜିନିୟର ରାମନାଥ ଜାନି ନିଜ ସମର୍ଥକଙ୍କ ସହ ସର୍ବପ୍ରଥମେ ମଞ୍ଚଗାଁ ପଞ୍ଚାୟତର ବୁଢି ଠାକୁରାଣୀ ଏବଂ ମା ମାଣିକେଶ୍ବରୀଙ୍କ ପାଖରେ ନଡ଼ିଆ ଭାଙ୍ଗି ପୂଜା କରିଥିଲେ । ଏହାପରେ ମା'ଙ୍କ ଆଶୀର୍ବାଦ ନେଇ ପ୍ରଚାର ମୈଦାନକୁ ଜୀଅନ୍ତା ମାଛ ଧରି ମଞ୍ଚାଗାଁ, ବଙ୍ଗଳାଗୁଡା, ବିରିଗୁଡା, ବେଡାପଦର, କେନ୍ଦୁଗୁଡା, ବାରିଆଘାତ ସମେତ ପଞ୍ଚାୟତର ଗ୍ରାମ ବୁଲିଥିଲେ । ଏହାସହିତ ଲୋକମାନଙ୍କୁ ଭୋଟ ଦେବାକୁ ନିବେଦନ କରିଥିବା ଦେଖିବାକୁ ମିଳିଛି ।
ନିର୍ବାଚନରେ ଜିତିଲେ ଏହି ଅଞ୍ଚଳର ସମସ୍ତ ପ୍ରକାର ଅସୁବିଧା ଯେପରିକି ରାସ୍ତାଘାଟରୁ ଆରମ୍ଭ କରି ପାନୀୟ ଜଳ, ଡ୍ରେନ ସମସ୍ୟା, ଉପଯୁକ୍ତ ହିତାଧିକାରୀଙ୍କୁ ଆବାସଗୃହ ପେନସନ ଯୋଗେଇ ଦେବାକୁ ପ୍ରତିଶୃତି ଦେଇଥିଲେ । ପଞ୍ଚାୟତର ସେ ଜଣେ ଉଚ୍ଚ ଶିକ୍ଷିତ ପ୍ରାର୍ଥୀ ହୋଇଥିବାରୁ ତାଙ୍କୁ ବହୁ ମାତ୍ରାରେ ସମର୍ଥନ ମିଳୁଥିବା ଦେଖିବାକୁ ମିଳୁଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
