ନବରଙ୍ଗପୁର: ସାରା ବିଶ୍ବରେ ମହାମାରୀ କୋରୋନା ଆତଙ୍କ ଖେଳାଉଛି । ଏହି ଭୂତାଣୁରୁ ମୁକ୍ତି ପାଇବା ପାଇଁ ଭାରତ ସରକାରଙ୍କ ଦ୍ବାରା ସାମାଜିକ ଦୂରତା ବଜାଇ ରଖିବା ଏବଂ ଲକଡାଉନ ପାଳନ କରାଯାଉଛି । ଗରିବ ଅସହାୟ ଲୋକ ମାନେ ଘରୁ ପଦାରେ ବାହାରି ନପାରି ନିଜର ଜୀବିକା ହରାଇ ବସିଛନ୍ତି । ଏହିଭଳି ସମୟରେ ଲୋକଙ୍କ ପାଇଁ ଦେବଦୂତ ପାଲଟିଛି ସ୍ବେଚ୍ଛାସେବୀ ସଂଗଠନ ଡ୍ରିମ ଇଣ୍ଡିଆ ଟ୍ରାନ୍ସଫର୍ମେସନ ।
ନବରଙ୍ଗପୁର ଜିଲ୍ଲା କୋଷାଗୁମୁଡ଼ା ସ୍ଥିତ ଡ୍ରିମ ଇଣ୍ଡିଆ ଟ୍ରାନ୍ସଫର୍ମେସନ ନାମକ ଏକ ଘରୋଇ ସଂସ୍ଥା ଗରିବ ଲୋକମାନଙ୍କୁ ସାହାଯ୍ୟର ହାତ ବଢାଇଛି । ଏହି ସଂସ୍ଥା ଗତ ମାର୍ଚ୍ଚ ୨୮ ତାରିଖରୁ ଗ୍ରାମାଞ୍ଚଳରେ ଘର ଘର ବୁଲି ଲୋକମାନଙ୍କୁ ସାମାଜିକ ଦୂରତା ଅବଲମ୍ବନ କରିବା ସହ ବାରମ୍ବାରରେ ସାବୁନରେ ହାତ ଧୋଇବା, ମୁହଁରେ ମାସ୍କ ପିନ୍ଧିବା, ବାରମ୍ବାର ଆଖି, ନାକ ଆଉ ପାଟିକୁ ନ ଛୁଇଁବା ଭଳି ଉପଦେଶ ଦେଇ ଜନସାଧାରଣଙ୍କୁ ସଚେତନ କରୁଛି । କାମତା ଗ୍ରାମପଞ୍ଚାୟତର ସମାଜସେବୀ ସରୋଜ ଖୁରାଙ୍କ ନେତୃତ୍ବରେ ଶନିବାର ତେନ୍ତୁଳିଖୁଣ୍ଟି ବ୍ଲକର ୨୦୧ ଟି ଗରିବ ଓ ଅସହାୟ ପରିବାରଙ୍କୁ ରିଲିଫ ବଣ୍ଟନ କରାଯାଇଛି । ଏହି ସମୟରେ ଲୋକ ମାନଙ୍କୁ ଗୋଟିଏ ପରିବାର ପିଛା ୧୦ କିଲୋ ଚାଉଳ, ୫ କିଲୋ ଡାଲି, ଅଟା, ଆଳୁ, ପିଆଜ, ଲୁଣ, ତେଲ, ସୋୟାବିନ ବଡ଼ି, ମସଲା, ପନିପରିବା, ସାବୁନ ଭଳି ଅନ୍ୟ ଆବଶ୍ୟକୀୟ ସାମଗ୍ରୀକୁ ରିଲିଫ ଆକାରରେ ବଣ୍ଟନ କରାଯାଉଛି । ଏହି ରିଲିଫ ପାଇ ଅସହାୟ ପରିବାର ବର୍ଗ ଡ୍ରିମ ଇଣ୍ଡିଆ ଟ୍ରାନ୍ସଫର୍ମେସନକୁ ଭୂୟସୀ ପ୍ରସଂଶା କରିବା ସହ ଧନ୍ୟବାଦ ଅର୍ପଣ କରିଛନ୍ତି ।
ସେହିପରି ଡ୍ରିମ ଇଣ୍ଡିଆ ଟ୍ରାନ୍ସଫର୍ମେସନ ପ୍ରତିଦିନ ୩୦୦ ଲୋକଙ୍କୁ ରନ୍ଧା ଖାଦ୍ୟ ଯୋଗାଉଥିବା ଜଣାପଡିଛି ।ଆଗାମୀ ଦିନରେ ମଧ୍ୟ ନବରଙ୍ଗପୁର ଜିଲ୍ଲାର ବିଭିନ୍ନ ସ୍ଥାନରେ ରିଲିଫ ବଣ୍ଟନ କରାଯିବ ବୋଲି ଡ୍ରିମ ଇଣ୍ଡିଆର ମୁଖ୍ୟ ପଙ୍କଜ ସିପା ସୂଚନା ଦେଇଛନ୍ତି ।
ନବରଙ୍ଗପୁର ତପନ କୁମାର ବିଷୟୀ,ଇଟିଭି ଭାରତ
