ନବରଙ୍ଗପୁର: ଓଡ଼ିଆ ଚିତ୍ରକରଙ୍କ ଫ୍ୟାନ ସାଜିଲେ ବଲିଉଡ ବାଦଶାହ ଶାହାରୁଖ ଖାନ । ଟ୍ବିଟ ମାଧ୍ୟମରେ ନବରଙ୍ଗପୁର ଚିତ୍ରକର ରାହୁଲ ପାତ୍ରଙ୍କ ଚିତ୍ରକଳାକୁ ଶାହାରୁଖ ଭୂୟସୀ ପ୍ରଶଂସା କରିଛନ୍ତି । ଜିଲ୍ଲା ପାପଡାହାଣ୍ଡିର ଚିତ୍ରକର ରାହୁଲ ପାତ୍ର ଯବାନ ଚଳଚ୍ଚିତ୍ରର ବିଶାଳ ପୋଷ୍ଟର କାନ୍ଥରେ ଆଙ୍କିଥିଲେ । ଖୋଦ ସୁପରଷ୍ଟାର ଶାହରୁଖ ଖାନ ସୋସିଆଲ ମିଡିଆରେ ଏହି ଚିତ୍ରକଳାକୁ ରିପୋଷ୍ଟ କରି ଯୁବ ଚିତ୍ରକରଙ୍କ ଫ୍ୟାନ୍ ପାଲଟି ଯାଇଛନ୍ତି ।
ଏନେଇ ଶାହାରୁଖ ନିଜ X ହ୍ୟାଣ୍ଡେଲରେ ଲେଖିଛନ୍ତି, "ରାହୁଲ ନାମ ତୋ ସୁନା ହି ହେ । ୟୁ ଆର୍ ଭେରି ଟ୍ୟାଲେଣ୍ଟେଡ ମାଇ ମ୍ୟାନ୍ । ଫାଣ୍ଟାଷ୍ଟିକ ଆର୍ଟୱାର୍କ ।" ଏଭଳି କିଛି କହି ସୋସିଆଲ ମିଡିଆରେ ରାହୁଲଙ୍କ ପ୍ରଶଂସା କରିଛନ୍ତି କିଙ୍ଗ୍ ଖାନ । ନିଜ ପ୍ରଶଂସକ ଦ୍ବାରା ଅଙ୍କା ଯାଇଥିବା ଚିତ୍ରକୁ ଦେଖି ନିଜ ଭାବାବେଗକୁ ସୋସିଆଲ ମିଡିଆ ସାଇଟ Xରେ ପୋଷ୍ଟ କରିଛନ୍ତି କିଙ୍ଗ ଖାନ । ଯାହା ବର୍ତ୍ତମାନ ନବରଙ୍ଗପୁରରେ ଚର୍ଚ୍ଚାର ବିଷୟ ପାଲଟିଛି । ଏହା ଜାଣିବା ପରେ ରାହୁଲଙ୍କ ପରିବାର ଲୋକେ ମିଠା ଖାଇ ସେଲିବ୍ରେସନ କରିଛନ୍ତି ।
ଏହା ବି ପଢନ୍ତୁ- Jawan Craze: ରିଲିଜର ପ୍ରଥମ ଦିନରେ ସେଲିବ୍ରେସନ, ହଲ୍ ସାମ୍ନାରେ ନାଚିଲେ ଫ୍ୟାନ୍ସ
ବଡ଼ ପରଦାରେ ଧମାଲ କରୁଛି ସୁପରଷ୍ଟାର ଶାହାରୁଖ ଖାନଙ୍କ ଅଭିନୀତ ଚଳଚ୍ଚିତ୍ର ଯବାନ । ସାରା ଦେଶରେ 'ଯବାନ'ର କ୍ରେଜ ଦେଖିବାକୁ ମିଳିଛି । ତେବେ ଦର୍ଶକୀୟ ଆଦୃତି ପାଇଥିବା ଏହି ଫିଲ୍ମର ବିଶାଳ ପୋଷ୍ଟରର ଏକ ଚିତ୍ର କାନ୍ଥରେ ଆଙ୍କିଥିଲେ ରାହୁଲ । ସେପ୍ଟେମ୍ବର ୯ ତାରିଖରେ ଯବାନ ଚଳଚିତ୍ର ରିଲିଜ ହେବା ପରେ ଚଳଚ୍ଚିତ୍ର ଦେଖି ଏହାର ଖୁବ ବଡ଼ ପ୍ରଶଂସକ ପାଲଟି ଯାଇଥିଲେ ରାହୁଲ ଏବଂ ପ୍ରଧାନିଗୁଡା କାଜୁମିଲ୍ର ଏକ କାନ୍ଥରେ ୫ ମିଟର ଚଉଡା ୧୦ ମିଟର ଉଚ୍ଚତା ବିଶିଷ୍ଟ ଯବାନ ଚଳଚ୍ଚିତ୍ରର ପୋଷ୍ଟର ଆଙ୍କିଥିଲେ । ଯାହାକୁ ପରବର୍ତ୍ତୀ ସମୟରେ ନିଜ ସୋସିଆଲ ମିଡିଆ ହ୍ୟାଣ୍ଡେଲରେ ଅପଲୋଡ କରିଥିଲେ ।
ବହୁ ସଂଖ୍ୟକ ଶାହାରୁଖଙ୍କ ପ୍ରଶଂସକ ଏହି ପୋଷ୍ଟ ଦେଖିବା ପରେ ଲାଇକ ଏବଂ କମେଣ୍ଟ କରିଥିଲେ । ରାହୁଲଙ୍କ ଚିତ୍ରକଳାକୁ ମଧ୍ୟ ପ୍ରଶଂସା ବି କରିଥିଲେ । ପରବର୍ତ୍ତୀ ସମୟରେ ନିଖୁଣ ପୋଷ୍ଟରକୁ ଶାହରୁଖ ଖାନ ଦେଖିବା ପରେ ଖୁବ ପ୍ରଶଂସା କରିଛନ୍ତି ଏବଂ ତାଙ୍କ X ହ୍ୟାଣ୍ଡେଲରେ ସେୟାର ମଧ୍ୟ କରିଛନ୍ତି । ଏହା ଜାଣିବା ପରେ ଲୋକେ ରାହୁଲଙ୍କୁ ଶୁଭେଚ୍ଛାର ବାର୍ତ୍ତା ଜଣାଇଛନ୍ତି । ଏନେଇ ରାହୁଲ କହିଛନ୍ତି,"ମୁଁ କେବେ ଭାବିନଥିଲେ ମୋ ଚିତ୍ରକୁ ଶାହାରୁଖ ପ୍ରଶଂସା କରିବେ । ଏହା ମୋ ପାଇଁ ବଡ଼ ସଫଳତା । କିଙ୍ଗ ଖାନ ଶାହାରୁଖଙ୍କଠାରୁ ଏହି କମ୍ଲ୍ପିମେଣ୍ଟ ପାଇବା ପରେ ମୋତେ ଆଗକୁ ଏପରି ଚିତ୍ର ଆଙ୍କିବାକୁ ପ୍ରେରଣା ଯୋଗାଇଛି । "
ରାହୁଲ ପେଶାରେ ସଫ୍ଟୱେର ଇଞ୍ଜିନିୟର ହୋଇଥିବା ବେଳେ ଆର୍ଟ ପ୍ରତି ତାଙ୍କର ଦୁର୍ବଳତା ରହିଛି । ସେ ବେଙ୍ଗାଲୁରୁର ଏକ କମ୍ପାନୀରେ ସଫ୍ଟୱେର ଇଞ୍ଜିନିୟର ଭାବେ କାର୍ଯ୍ୟରତ । ରାହୁଲଙ୍କ ବାପା ଶିବ ପ୍ରସାଦ ପାତ୍ର ଓ ମାଆ ଜଣେ ଶିକ୍ଷୟତ୍ରୀ । ପିଲାଟି ଦିନରୁ ରାହୁଲ ଅବସର ପାଇଲେ ଚିତ୍ର ଆଙ୍କନ୍ତି । ଯବାନ ଫିଲ୍ମ ରିଲିଜ ହେବା ପରେ ସିନେମାର ସଫଳତାକୁ ନିଜ ଚିତ୍ର ମାଧ୍ୟମରେ ରାହୁଲ ସେଲିବ୍ରେଟ କରିଛନ୍ତି । ସେହିପରି ଶାହରୁଖ ପ୍ରଶଂସା କରିଥିବାରୁ ସୋସିଆଲ ମିଡିଆରେ ରାହୁଲଙ୍କୁ ଶୁଭେଚ୍ଛା ମଧ୍ୟ ଜଣାଯାଉଛି । ତାଙ୍କର ଏହି ଚିତ୍ରକଳାଟି ଏବେ ସୋସିଆଲ ମେଡିଆରେ ବେଶ ଭାଇରାଲ ହେବାରେ ଲାଗିଛି ।
ଇଟିଭି ଭାରତ, ନବରଙ୍ଗପୁର
