ନବରଙ୍ଗପୁର: ଭାଲୁ ଖେଳୁଛି ଫୁଟବଲ । ଜଙ୍ଗଲ ମଧ୍ୟରେ ଆନନ୍ଦ ଉଲ୍ଲାସର ସହ ଫୁଟବଲ ଖେଳୁଛନ୍ତି 2 ଭାଲୁ । ଏଭଳି ଏକ ଦୁର୍ଲଭ ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ୍ ଅନ୍ତର୍ଗତ ସୁଖି ଗାଁରେ ।
ସୂଚନାନୁସାରେ ଉମରକୋଟ ବ୍ଲକ୍ ସୁଖି ଗାଁର କିଛି ଯୁବକ ପ୍ରତିଦିନ ଭଳି ଶନିବାର ଅପରାହ୍ନରେ ନିଜ ଗ୍ରାମ ନିକଟ ଖେଳ ପଡିଆରେ ଫୁଟବଲ୍ ଖେଳୁଥିଲେ । ଆଉ ଠିକ୍ ସେହି ସମୟରେ ଖେଳ ପଡିଆକୁ ଲାଗି ରହିଥିବା ଜଙ୍ଗଲରୁ ଦୁଇ ଗୋଟି ଭାଲୁ ଖେଳ ପଡିଆ ମଧ୍ୟକୁ ଚାଲି ଆସିଥିଲେ । ଆଉ ଘଟଣାସ୍ଥଳରେ ଭାଲୁ ଦୁଇଟିକୁ ଦେଖି ଯୁବକମାନେ ବଲ୍ ଛାଡି ଭୟରେ ଦୌଡିବାକୁ ଲାଗିଲେ ।
ତେବେ ଯୁବକମାନେ ଖେଳ ପଡିଆ ଛାଡିବାର କିଛି ସମୟ ମଧ୍ୟରେ ଫୁଟବଲ୍ ଖେଳରେ ମସଗୁଲ ହୋଇଥିଲେ ଦୁଇ ଭାଲୁ । ତେବେ ଏହି ଖେଳର ଦୃଶ୍ୟକୁ ଅତି ସାହସିକତାର ସହ ନିଜ କ୍ୟାମେରାରେ କଏଦ କରିଛନ୍ତି ସ୍ଥାନୀୟ ଯୁବକ । ଯାହାକୁ ନେଇ ଏବେ ସ୍ଥାନୀୟ ଅଞ୍ଚଳରେ ଚହଳ ସୃଷ୍ଟି କରିଛି ।
ପରେ ଏହି ଭିଡିଓକୁ ବିଭିନ୍ନ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ଭାଲୁ ଫୁଲବଲ ଖେଳିବା ଘଟଣାକୁ ନେଇ ସବୁଠି ଚର୍ଚ୍ଚାର ବିଷୟ ପାଲଟିଛି ।ସେପଟେ ଏହି ଘଟଣାକୁ ନେଇ ଗ୍ରାମବାସୀ ଆତଙ୍କିତ ହୋଇ ପଡିଥିବାବେଳେ ଘଟଣା ସମ୍ପର୍କରେ ଉମରକୋଟ ରେଞ୍ଜର ଅବଗତ ଥିବା କହିବା ସହ ସ୍ଥାନୀୟ ଲୋକଙ୍କୁ ସଚେତନ କରାଯାଉଥିବା ନେଇ ଫୋନ୍ ଯୋଗେ କହିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
