ନବରଙ୍ଗପୁର: ମନ୍ଦିର ପରିସରରେ ଭାଲୁ ଆତଙ୍କ । ମନ୍ଦିରରେ ଥିବା ପ୍ରସାଦ ଖାଇବାକୁ ଉଦ୍ୟମ କଲେ ଭାଲୁ । ଖାଦ୍ୟ ଅନ୍ବେଷଣରେ ଆସି ମନ୍ଦିରରେ ପଶିବାକୁ ଉଦ୍ୟମ କଲେ ୩ ଭାଲୁ । ଏଭଳି ଦୃଶ୍ୟ ଦେଖିବାକୁ ମିଳିଛି ଜିଲ୍ଲାର ନନ୍ଦାହାଣ୍ଡି ବ୍ଲକ ଅନ୍ତର୍ଗତ ଦହଣା ଗାଁରେ ଥିବା ହନୁମାନ ମନ୍ଦିର ଓ ଶିବ ମନ୍ଦିର ପରିସରରେ । ମନ୍ଦିର ପରିସରରେ ମା’ ସହ ଦୁଇ ଛୁଆ ଭାଲୁ ବୁଲୁଥିବା ଗତକାଲି ରାତିରେ ଦେଖିବାକୁ ମିଳିଥିଲା ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।
ସୂଚନାଅନୁୟାୟୀ ପ୍ରତ୍ୟେକ ଦିନ ରାତିରେ ଏହି ଭାଲୁ ମାନେ ଖାଦ୍ୟ ଅନ୍ବେଷଣରେ ଗାଁ ଭିତରକୁ ଚାଲି ଆସୁଥିବାବେଳେ ଗତକାଲି ରାତିରେ ମଧ୍ୟ ଆସିଥିଲେ । ପ୍ରଥମେ ଗାଁ ଉପକଣ୍ଠରେ ଥିବା ହନୁମାନ ଓ ଶିବ ମନ୍ଦିର ପରିସର ଭିତରକୁ ପ୍ରବେଶ କରୁଥିବାର ଉଦ୍ୟମ କରୁଥିଲେ । ସେହି ସମୟର ଦୃଶ୍ୟକୁ ଗାଁର କିଛି ଯୁବକ ନିଜ ମୋବାଇଲରେ କଏଦ କରିଥିଲେ । ଗତକାଲି ମକର ସଂକ୍ରାନ୍ତି ଥିବାରୁ ମନ୍ଦିରରେ ଥିବା ପୂଜା ପ୍ରସାଦରେ ଫଳ ରହିଥିଲା ଯାହାକୁ ଦେଖି ଭାଲୁ ମାନେ ମନ୍ଦିର ଭିତରକୁ ପଶିବାକୁ ଉଦ୍ୟମ କରି ମନ୍ଦିର ଗେଟ ଉପରେ ମଧ୍ୟ ଚଢିଥିଲେ ।
ଗ୍ରାମବାସୀଙ୍କ କହିବା ଅନୁସାରେ ଭାଲୁ କାହାର କିଛି କ୍ଷତି ନ ପହଞ୍ଚାଇ ଏଭଳି ପ୍ରତ୍ୟେକ ଦିନ ଆସନ୍ତି ପୁଣି ନିକଟସ୍ଥ ଜଙ୍ଗଲକୁ ଚାଲିଯାଆନ୍ତି । ଏହା ଇନ୍ଦ୍ରାବତୀ ଠାରୁ ନବରଙ୍ଗପୁର ମୁଖ୍ୟାଳୟକୁ ସଂଯୋଗ କରୁଥିବାର ମୁଖ୍ୟ ଯାତାୟାତ ମାର୍ଗ ହୋଇଥିବାରୁ ରାସ୍ତା ଦେଇ ରାତିରେ ବି ଯାନବାହନ ଚଳାଚଳ ଜାରି ରହିଥାଏ କିନ୍ତୁ ଭାଲୁ ମାନେ କାହାର କିଛି ବି କ୍ଷତି କରୁନଥିବା ଗ୍ରାମବାସୀ ପ୍ରକାଶ କରିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
