ନବରଙ୍ଗପୁର: ପୁଣି ଗର୍ଭବତୀ ବୁହା ହେଲେ ଖଟିଆରେ । ଭଲରାସ୍ତା ନଥିବାରୁ 3 କିମି ଖଟିଆରେ ବୋହି ମେଡିକାଲକୁ ଆସିଛନ୍ତି ଗର୍ଭବତୀ । ଏପରି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ମଇଦରପୁର ଅନ୍ତର୍ଗତ ଆମ୍ଭଡିପଦର ଗାଁରେ । ଏଠାରେ ଗର୍ଭବତୀ ମହିଳା ଦଶାଇ ସାନ୍ଥାଙ୍କୁ ଖଟିଆରେ ବୋହି ମଇଦଲପୁର ଡାକ୍ତରଖାନାକୁ ଅଣାଗଲା ।
ଆମ୍ଭଡିପଦର ଗାଁରେ କଚ୍ଚା ରାସ୍ତା ଏବେ ବାଧକ ସାଜିଛି । ଆମ୍ବୁଲାନ୍ସ ତ ଦୂରର କଥା ଏହି ଗାଁର ରାସ୍ତାରେ ସାଇକେଲଟେ ଯିବା ଅସମ୍ଭବ । ଏପରି ସ୍ଥଳେ ସୋମବାର ଦିନ 10ଟାରେ ଦଶାଇ ସାନ୍ଥାଙ୍କ ହଠାତ ଗର୍ଭ ଯନ୍ତ୍ରଣା ହେଲା। ତାଙ୍କୁ ତୁରନ୍ତ ମେଡିକାଲ ନେବାକୁ ଆଶାଦିଦି ପରାମର୍ଶ ଦେଇଥିଲେ । ସେପଟେ ଆମ୍ବୁଲାନ୍ସକୁ ମଧ୍ୟ ଫୋନ କରାଗଲା । ହେଲେ ଏହି ଖାଲଢିପ, କାଦୁଅ ପଚପଚ ରାସ୍ତା ସାଜିଲା ବାଧକ । ଗାଁରୁ 3 କିମି ଦୂର ଯାଏଁ ରାସ୍ତା ଖରାପ ଥିଲା । ଆମ୍ବୁଲାନ୍ସ ଗାଁ ଭିତରକୁ ନଯାଇ ମୁଖ୍ୟ ରାସ୍ତାରେ ଠିଆ ହୋଇ ରହିଲା ।
ସେପଟେ ଗର୍ଭବତୀ ମହିଳାଙ୍କୁ ଗାଁ ଲୋକେ ଏକ ଖଟିଆରେ 3 କିମି ବୋହି ମୁଖ୍ୟ ରାସ୍ତାକୁ ଆଣିଥଲେ। ପରେ ଆମ୍ବୁଲାନ୍ସରେ ଗର୍ଭବତୀଙ୍କୁ ନିଆଯାଇ ମଇଦଲପୁର ଡାକ୍ତରଖାନାରେ ଭର୍ତ୍ତି କରାଯାଇଛି । ଏନେଇ ଗାଁ ଲୋକେ ମଧ୍ୟ ରାସ୍ତା ଅବସ୍ଥା ଠିକ ନଥିବାରୁ ଏପରି ଅସୁବିଧା ଉପୁଜିଥିବା ଅଭିଯୋଗ କରିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
