ନବରଙ୍ଗପୁର: ଥାନା ହାଜତରୁ ଅଭିଯୁକ୍ତ ଫେରାର । ଏଭଳି ଘଟଣା ଘଟିଛି ନବରଙ୍ଗପୁର ଜିଲ୍ଲା ଡାବୁଗାଁ ଥାନାରେ । ଖବର ମୁତାବକ ଗତକାଲି ଡାବୁଗାଁ ଥାନା ଅଂଚଳରେ ତିନି ଜଣ ଯୁବକ ରାସ୍ତାରେ ଯାତାୟତ କରୁଥିବା ଗାଡି ଗୁଡିକ ଠାରୁ ବେଆଇନ ଭାବେ ଟଙ୍କା ଆଦାୟ କରୁଥିଲେ । ଏହି ଘଟଣାରେ ଡାବୁଗାଁ ପୋଲିସ ପ୍ରମୋଦ ସିଂ କନଓ୍ବାର, ଜଲାଟିଓ ଚିଷ୍ଟିଆନ ଓ ହେମଧର ହରିଜନ ନାମକ ତିନି ଜଣକୁ ଗିରଫ କରି ଥାନାକୁ ଆଣିଥିଲା । ହେଲେ ପୋଲିସ ହାଜତରୁ କୌଶଳ କ୍ରମେ ଅଭିଯୁକ୍ତ ହେମଧର ହରିଜନ ଫେରାର ହୋଇଯାଇଥିବା ନେଇ ଡାବୁଗାଁ ଥାନା ଅଧିକାରୀ ସୂଚନା ଦେଇଛନ୍ତି ।
ସେମାନଙ୍କ ମଧ୍ୟରୁ ଦୁଇ ଜଣକ ଘର ନବରଙ୍ଗପୁର ଜିଲ୍ଲାରେ ହୋଇଥିବାବେଳେ ଜଣକ ଘର ଜଗଦଲପୁର ବୋଲି ଜଣାପଡିଛି । ଉକ୍ତ ତିନି ଜଣକ ମଧ୍ୟରେ ଜଣେ ଛତିଶଗଡ଼ ଜଗଦଲପୁର ଅଂଚଳର ପୋଲିସ କନେଷ୍ଟବଲ ହୋଇଥିବାବେଳେ ସେ କିଛି ଦିନ ହେଲା ଛୁଟିରେ ଥିବା ଜଣାପଡିଛି ।
ଖବର ପାଇ ଉମରକୋଟ ଏସଡିପିଓ ହେମନ୍ତ କୁମାର ପାଢୀ ଡାବୁଗାଁ ପହଞ୍ଚି ତଦନ୍ତ ଆରମ୍ଭ କରିବା ସହ ଅଭିଯୁକ୍ତକୁ ଧରିବା ପାଇଁ ବିଭିନ୍ନ ଅଂଚଳରେ ପୋଲିସ ଟିମ୍ ପଠାଇଥିବା ଜଣାପଡିଛି । ଏ ନେଇ ପୋଲିସ ପକ୍ଷରୁ କୌଣସି ବିବୃତ୍ତି ଦିଆଯାଇନାହିଁ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
