ନବରଙ୍ଗପୁର: ଜିଲ୍ଲା ଝରିଗାଁ ରେଞ୍ଜ ପାନାବେଡା ପିଆରଏଫରେ ଚଢାଉ । ଘୁମରମୁଣ୍ଡି ଜଙ୍ଗଲରୁ 2ଟି ଦେଶୀ ବନ୍ଧୁକ ସହ 4 ଜଣ ବନ୍ୟଜନ୍ତୁ ଶିକାରୀକୁ ଅଟକ ରଖିଛି ବନ ବିଭାଗ । ଅଟକ ବ୍ୟକ୍ତିଙ୍କ ମଧ୍ୟରେ ଚନ୍ଧାହାଣ୍ଡି ବ୍ଲକ କୁହୁଡି ଗ୍ରାମର ଅଭିକ୍ଷିତ ଭୁଞ୍ଜିଆ, ମନୋହର ପୂଜାରୀ, ବିକ୍ରମ ଭୁଞ୍ଜିଆ, ଗଜେନ୍ଦ୍ର ସୁନା ।
ଭୁବନେଶ୍ବରରୁ ଆସିଥିବା ବନ୍ୟଜନ୍ତୁ ବିଶେଷଜ୍ଞ ଦଳ ଓ ଝରିଗାଁ ଜଙ୍ଗଲ ବିଭାଗ ଅଧିକାରୀମାନେ ଜଙ୍ଗଲ ଭ୍ରମଣରେ ଆସିଥିବା ବେଳେ ଶିକାରୀଙ୍କୁ ଧରିଥିଲେ । ସୂଚନାନୁଯାୟୀ, ଗତକାଲି ନିଜ ଗାଁ ୧୫ ରୁ ୨୦ ଜଣ ଲୋକଙ୍କ ସହ ଶିକାର କରିବାପାଇଁ ପାନାବେଡ଼ା PRF, ଘୁମରମୁଣ୍ଡି ଜଙ୍ଗଲକୁ ଯାଇଥିଲେ । ଏଥିସହ ବିଭିନ୍ନ ସ୍ଥାନରେ ଜାଲ ବିଛାଇଥିଲେ । ତେବେ ବିଶେଷଜ୍ଞଙ୍କ ଗସ୍ତ ବେଳେ ସମସ୍ତ ଫେରାର ହୋଇଯାଇଥିବା ବେଳେ ବିନା ଲାଇସେନ୍ସଧାରୀ 4 ଜଣ ବ୍ୟକ୍ତି ଅଧିକାରୀଙ୍କ ହାବୁଡରେ ପଡିଯାଇଥିଲେ ।
ଫାଶ ପକାଇଥିବା ସାମଗ୍ରୀ ଓ 2ଟି ବନ୍ଧୁକକୁ ଜବତ କରିବା ସହ ଅଧିକ ତଦନ୍ତ କରୁଛି ବନ ବିଭାଗ । ତେବେ ସେହି ସ୍ଥାନରେ କୌଣସି ଶିକାର ହୋଇନଥିବା କହିଛନ୍ତି ବିଭାଗୀୟ ଅଧିକାରୀ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
