ବାରିପଦା: ଘରୋଇ କଳିର କରୁଣ ପରିଣତି । ପରିବାର ସହ ମତାନ୍ତର ଯୋଗୁଁ କୂଅକୁ ଡେଇଁ ମହିଳା ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଏଭଳି ଏକ ଦୁଃଖଦ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ମୋରଡ଼ା ଥାନା ମାଳିହତା ଗାଁରେ । ମୃତ ମହିଳା ହେଲେ ସେହି ଗାଁର ପ୍ରଭାସିନୀ ମହାନ୍ତି ।
ସୂଚନାନୁଯାୟୀ, ମହିଳା ଜଣକ ମାନସିକ ଅବସ୍ଥା କିଛି ମାସ ହେବ ଠିକ୍ ନଥିବା ବେଳେ ସୋମବାର କୌଣସି କାରଣକୁ ନେଇ ସେ ଘର ପଛପଟେ ଥିବା ଏକ କୂଅକୁ ଡେଇଁ ପଡିଥିଲେ । ପରିବାର ଲୋକେ ଆସି ଖୋଜା ଖୋଜି କରିବାରୁ କୂଅରେ ମହିଳା ଜଣଙ୍କ ପଡିଥିବାର ଦେଖି ଅଗ୍ନିଶମ ବିଭାଗକୁ ଖବର ଦେଇଥିଲେ। ଅଗ୍ନିଶମ ବିଭାଗର କର୍ମଚାରୀ ଘଟଣାସ୍ଥଳରେ ପହଞ୍ଚି କୂଅ ଭିତରୁ ମହିଳାଙ୍କ ମୃତଦେହ ଉଦ୍ଧାର କରିଥିଲେ। ଏନେଇ ମୋରଡ଼ା ପୋଲିସ ୧୨/୨୦ରେ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଆରମ୍ଭ କରିଥିବା ବେଳେ ମୃତଦେହକୁ ବ୍ୟବଚ୍ଛେଦ ପାଇଁ ବାରିପଦା ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଆଣ୍ଡ ହସ୍ପିଟାଲକୁ ପଠାଇଥିବା ଜଣାପଡିଛି।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
