ବାରିପଦା : ମୟୂରଭଞ୍ଜ ଜିଲ୍ଲା, ବେତନଟୀ ରେଞ୍ଜ ଅଧୀନ ଛଚିନାପଦା ନିକଟରେ ହାତୀ ଆକ୍ରମଣରେ ଜଣଙ୍କର ମୃତ୍ୟୁ ଘଟିଛି । ଖବରପାଇ ବନବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ବାରିପଦା ଆଣିଛନ୍ତି । ମୃତକ ଜଣଙ୍କ ହେଲେ ନୂଆଗାଁ ଗ୍ରାମର ସିଂଗରାୟ ମାଝୀ । ତେବେ ଦୁଇଦିନ ଧରି ଝାଡଖଣ୍ଡରୁ ଆସିଥିବା ୭୧ ଟିକିଆ ହାତୀପଲ ବେତନଟୀ ରେଞ୍ଜ ମନତାପାଳ ଶାଳ ଜଙ୍ଗଲରେ ରହିଛନ୍ତି ।
ଗତ ରାତିରେ ଖାଦ୍ୟ ଅନ୍ବେଷଣରେ ଛଚିନାପଦା ଗ୍ରାମ ପଟକୁ ୧୧ଟି ହାତୀ ପଳାଇ ଆସିଥିଲେ । ଆଜି ସିଂଗରାୟ କୌଣସି କାମରେ ଯାଇଥିବା ବେଳେ ହାତୀ ହାବୁଡରେ ପଡି ବର୍ତ୍ତି ପାରିନଥିଲେ । ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ବନବିଭାଗ ପୂର୍ବ ଭଳି ହାତୀପଲ ଆସିବା ସମୟରେ ଗ୍ରହଣ କରୁଥିବା ପଦକ୍ଷେପ ବର୍ତ୍ତମାନ ନେଉନଥିବାରୁ ନିରୀହଙ୍କ ଜୀବନ ଯାଉଛି । ଯାହାକୁ କେନ୍ଦ୍ର କରି ହାତୀ ଚଳପ୍ରଚଳ ଚିହ୍ନଟ ସଂଲଗ୍ନ ଅଞ୍ଚଳବାସୀ ଆତଙ୍କିତ ରହିବା ସହିତ ଅସନ୍ତୋଷ ବ୍ୟକ୍ତ କରୁଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
