ବାରିପଦା: ମୟୁରଭଞ୍ଜ ଜିଲ୍ଲାର ମୋରଡା ବ୍ଲକ ଅନ୍ତର୍ଗତ ଇଦର ଗ୍ରାମରେ ଜଣେ ବ୍ୟକ୍ତି କୋରୋନା ପଜିଟିଭ ଚିହ୍ନଟ ପରେ ଗ୍ରାମବାସୀଙ୍କୁ ସାମାଜିକ ବାସନ୍ଦ ଅଭିଯୋଗ । ପ୍ରତିବାଦରେ ରାଜରାସ୍ତାକୁ ଓହ୍ଲାଇଛନ୍ତି ଗ୍ରାମବାସୀ ।
ସରକାର ନାରା ଦେଉଛନ୍ତି ରୋଗକୁ ଘୃଣା କର ରୋଗୀ କୁ ନୁହେଁ କିନ୍ତୁ ବାସ୍ତବ ଚିତ୍ର କିଛି ଓଲଟା ଦେଖିବାକୁ ମିଳୁଛି। ମୟୁରଭଞ୍ଜ ଜିଲ୍ଲା ମୋରଡ଼ା ବ୍ଲକ ଇଦର ଗାଁରେ । ସୋମବାର ଏହି ଗାଁରୁ ଜଣେ କୋରୋନା ପଜିଟିଭ ଚିହ୍ନଟ ହେବାପରେ ପୋଡ଼ାଶୀ ଗ୍ରାମବାସୀ ଇଦର ବାସୀଙ୍କୁ ସାମାଜିକ ବାସନ୍ଦ କରିଥିବା ଅଭିଯୋଗ ହୋଇଛି ।
ଫଳରେ ବାରିପଦା-ଚିତ୍ରଡା ରାସ୍ତାର ବାରମାଇଲ ଛକରେ ଇଦର ଗ୍ରାମବାସୀ ରାସ୍ତାରୋକ କରିଛନ୍ତି । ପଡୋଶୀ ଗାଁ ଲୋକେ ପୋଖରୀରେ ଗାଧୋଇବା ପାଇଁ ବାରଣ କରିବା ସହ କୂଅରୁ ପାଣିନେବା ପାଇଁ ମନା କରୁଥିବା ଅଭିଯୋଗ ହୋଇଛି । ତା ସହ ଦୋକାନୀମାନେ ମଧ୍ୟ ସଉଦା ଦେବାକୁ ମଧ୍ୟ ଅରାଜି ହେଉଥିବା ଗ୍ରାମବାସୀ କହିଛନ୍ତି । ସବୁଠାରୁ ବଡ଼କଥା ହେଉଛି ଇଦର ଗାଁର ଶିଶୁ ମାନଙ୍କୁ ମଧ୍ୟ କିଷାନତାଣ୍ଡି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ସ୍ବାସ୍ଥ୍ୟ ବିଭାଗର କର୍ମଚାରୀ ପୋଲିଓ ଟୀକା ଦେବାକୁ ମନା କରିଥିବା ସଙ୍ଗୀନ ଅଭିଯୋଗ ହୋଇଛି ।
ଅନ୍ୟପଟେ ଇଦର ଗ୍ରାମବାସୀ ଆଶାକର୍ମୀଙ୍କୁ ମାଡ ମାରିବା ସହ ଲହୁଲୁହାଣ କରିଥିବା ଅଭିଯୋଗ କରି କିଷାନ ତାଣ୍ଡି ହସ୍ପିଟାଲରେ ନ୍ୟାୟ ଅପେକ୍ଷାରେ ବସିଛନ୍ତି ଆଶାକର୍ମୀ ମିନା ମୁଖୀ । ଦୀର୍ଘ ତିନି ଘଣ୍ଟାରୁ ଉର୍ଦ୍ଧ୍ବ ସମୟ ରାସ୍ତା ରୋକ ହେବାପରେ ଘଟଣାସ୍ଥଳରେ ବିଡ଼ିଓ, ତହସିଲଦାର ଓ ପୋଲିସ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରିବା ପରେ ରାସ୍ତା ଅବୋରାଧ ହଟିଛି ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
