ବାରିପଦା : ମୟୂରଭଞ୍ଜ ଜିଲ୍ଲା ମୋରଡା ତହସିଲଦାରଙ୍କୁ ଗ୍ରାମାବାସୀ ଅଟକ ରଖିବା ଘଟଣା । ରାସ୍ତା ନିର୍ମାଣ ପାଇଁ ପ୍ରତିଶୃତି ଦେବା ପରେ ମୋରଡା ତହସିଲଦାର ପ୍ରିୟଦର୍ଶନୀ ମଲ୍ଲିକଙ୍କୁ ଛାଡିଲେ ଗ୍ରାମବାସୀ ।
ସୂଚନାଅନୁଯାୟୀ ମଙ୍ଗଳବାର ମୟୂରଭଞ୍ଜ ଜିଲ୍ଲା ମୋରଡା ତହସିଲ ଅନ୍ତର୍ଗତ ବଡମୁଣ୍ଢାବଣି ଗାଁ ରେ ପହଞ୍ଚି ବେଆଇନ ବାଲିଘାଟ ବନ୍ଦ ସହ ନଦୀକୁ ଯାଇଥିବା ରାସ୍ତାକୁ ଜେସିବି ଲଗାଇ ଖୋଳି ଦେଇଥିଲେ । ଗ୍ରାମବାସୀଙ୍କ ଅଭିଯୋଗ ଆଗକୁ ଧାନ ଅମଳର ସମୟ ଥିବାରୁ ରାସ୍ତା ଖୋଳିଲେ ଚାଷ ଜମିରୁ ଧାନ ଆଣିବାରେ ସମସ୍ୟା ସୃଷ୍ଟି ହେବ । ଏହାକୁ ନେଇ ଯାତାୟାତ ମଧ୍ୟ ବାଧାପ୍ରାପ୍ତ ହୋଇଛି । ତେବେ ତହସିଲଦାର ଖୋଳିଥିବା ରାସ୍ତାକୁ ମରାମତି କରିବା ପରେ ତହସିଲଦାରଙ୍କୁ ଗ୍ରାମବାସୀ ଛାଡିବେ ବୋଲି ବୋଲି କହିଛନ୍ତି ।
ଖବର ପାଇ ଘଟଣାସ୍ଥଳରେ ମୋରଡ଼ା ପୋଲିସ ପହଞ୍ଚି ଗ୍ରାମବାସୀଙ୍କୁ ବୁଝାସୁଝା କରିଛନ୍ତି । ଏହାପରେ ଗ୍ରାମବାସୀଙ୍କୁ ତହସିଲଦାର ରାସ୍ତା ନିର୍ମାଣ ପାଇଁ ପ୍ରତିଶୃତି ଦେଇଛନ୍ତି । ଏହା ପରେ ତହସିଲଦାରଙ୍କୁ ଗ୍ରାମବାସୀ ଛାଡିଥିଲେ । ବର୍ତ୍ତମାନ ଘଟଣାସ୍ଥଳରେ ଉତ୍ତେଜନା ଥମିଥିବା ଜଣାପଡିଛି । ସେପଟେ ବର୍ତ୍ତମାନ ପର୍ଯ୍ୟନ୍ତ ଗ୍ରାମରେ ଜେସିବି ରହିଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
