ରାଇରଙ୍ଗପୁର: କରଞ୍ଜିଆ ବନଖଣ୍ଡ ଅଞ୍ଚଳରେ ହାତୀ ଉପଦ୍ରବ ବଢିବାରେ ଲାଗିଛି । ହାତୀ ଉପଦ୍ରବରେ ଅତିଷ୍ଠ ହୋଇ ରେଞ୍ଜ ଅଫିସ ଘେରିଲେ ଗିଧିବାସ ଗ୍ରାମବାସୀ। ସୂଚନା ଅନୁସାରେ, ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡ ଅଞ୍ଚଳରେ ୨୫ ଟିକିଆ ଝାଡ଼ଖଣ୍ଡି ହାତୀପଲ ମାଡି ଆସିଥିଲେ । ବ୍ୟାପକ ପରିମାଣରେ ଧାନଫସଲ ଖାଇବା ସହ ଦଳି ଚକଟି ନଷ୍ଟ କରିଥିଲେ । ତେବେ ହାତୀ ଉପଦ୍ରବରେ ଅତିଷ୍ଠ ହୋଇ ପ୍ରଥମେ ଦୁଧିଆଣି ରେଞ୍ଜ ଅଫିସ ଘେରାଓ କରିଥିଲେ ଗିଧିବାସ ଗାଁର ଲୋକେ ।
କ୍ଷୟକ୍ଷତି ଆକଳନ କରିବାକୁ ରେଞ୍ଜ ଅଧିକାରୀଙ୍କୁ ଗାଁକୁ ଡାକି ନେଇଥିଲେ ଲୋକେ । ପରେ ସେଠାରେ ରେଞ୍ଜ ଅଧିକାରୀ ପହଞ୍ଚି କ୍ଷୟକ୍ଷତିର ଆକଳନ କରିଥିଲେ । ତେବେ ଏଠାରେ ସୂଚନା ଯୋଗ୍ୟଯେ, ଏହି ୨୫ଟିକିଆ ଝାଡ଼ଖଣ୍ଡି ହାତୀପଲଙ୍କ ଦୌରାତ୍ମରେ ଅତିଷ୍ଠ ହୋଇ ଏକ ମାସ ମଧ୍ୟରେ ଦୁଧିଆଣି ରେଞ୍ଜ କାର୍ଯ୍ୟାଳୟକୁ ଦୁଇ ଦୁଇ ଥର ଘେରାଓ କରାଯାଇଥିଲା । ଏହାସହ କରଞ୍ଜିଆ ବନଖଣ୍ଡ କାର୍ଯ୍ୟାଳୟକୁ ଥରେ ଘେରାଓ କରିଥିଲେ ତିନିଟି ଗାଁର ଲୋକେ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା,ଇଟିଭି ଭାରତ
