ରାଇରଙ୍ଗପୁର: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସହକାରୀ ଯନ୍ତ୍ରୀଙ୍କ ଘରେ ଚଢାଉ କରିଛି ଭିଜିଲାନ୍ସ । ମୟୂରଭଞ୍ଜ ଜିଲ୍ଲାର ବାରିପଦା ପିଏଚ ଡିଭିଜନ-୧ର ସହକାରୀ ଯନ୍ତ୍ରୀଙ୍କ ଘରେ ଆଜି ସକାଳୁ ଭିଜିଲାନ୍ସ ବିଭାଗ ପକ୍ଷରୁ ଚଢାଉ କରିଛି । ସହକାରୀ ଯନ୍ତ୍ରୀ ବାଣେଶ୍ବର ନାୟକ ବାରିପଦା ସ୍ଥିତ ପିଏଚ ଡିଭିଜନ-୧ରେ କାର୍ଯ୍ୟରତ ଅଛନ୍ତି । ପୂର୍ବରୁ ସହକାରୀ ଯନ୍ତ୍ରୀ ବାଣେଶ୍ୱର ନାୟକଙ୍କ ନାଁରେ ଅନେକ ଦୁର୍ନୀତି ନେଇ ଅଭିଯୋଗ ହୋଇଆସୁଥିଲା ।
ଅଭିଯୋଗ ଆଧାରରେ ବାରିପଦା ସ୍ଥିତ ସ୍ବତନ୍ତ୍ର ଭିଜିଲାନ୍ସ କୋର୍ଟଙ୍କ ନିର୍ଦ୍ଦେଶ କ୍ରମେ ଏହି ଚଢାଉ କରାଯାଇଛି । ସହକାରୀ ଯନ୍ତ୍ରୀ ବାଣେଶ୍ବର ନାୟକଙ୍କ ବାସଭବନରେ ଭିଜିଲାନ୍ସ ବିଭାଗ ଚଢାଉ କରିବା ସହିତ ତାଙ୍କର ସମ୍ପତ୍ତି ସମ୍ପର୍କରେ ଯାଞ୍ଚ କରୁଛି । ତେବେ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ବିଭାଗ ପକ୍ଷରୁ ସହକାରୀ ଯନ୍ତ୍ରୀଙ୍କ ଘର ସମେତ ଆଉ 5ଟି ସ୍ଥାନରେ ମଧ୍ୟ ରେଡ କରାଯାଉଥିବା ଜଣାପଡିଛି । ଏହି ଚଢାଉ ସମୟରେ ଅନେକ ଗୁରୁତ୍ବପୂର୍ଣ୍ଣ ତଥ୍ୟ ଭିଜିଲାନ୍ସ ହାତରେ ଲାଗିପାରେ ବୋଲିି କୁହାଯାଉଛି ।
ଏହା ବି ପଢନ୍ତୁ...Vigilance Raid: ଅବକାରୀ ASIଙ୍କ ଘରେ ଭିଜିଲାନ୍ସ ରେଡ
ସୂଚନା ଅନୁସାରେ, ସହକାରୀ ଯନ୍ତ୍ରୀ ବାଣେଶ୍ୱର ନାୟକଙ୍କ ବାରିପଦା ସହରର ରଘୁନାଥପୁରରେ ଥିବା ତିନି ମହଲା ବିଶିଷ୍ଟ ଘର ସମେତ ସରକାରୀ କାର୍ଯ୍ୟାଳୟରେ ରେଡ୍ ହୋଇଛି । ଏହାସହ ବଡସାହି ଥାନା ଅନ୍ତର୍ଗତ ତାଳନ୍ଦ ଗ୍ରାମରେ ଥିବା ପୈତୃକ ଘର ସହିତ ସେଠାରେ ଥିବା ଅନ୍ୟ ଦୁଇ ମହଲା ଘରେ ମଧ୍ୟ ବିଭାଗ ପକ୍ଷରୁ ଚଢାଉ କରାଯାଇଛି । ଖାଲି ସେତିକି ନୁହେଁ, ବୈଶିଙ୍ଗା ଥାନା ମାଣତ୍ରୀରେ ଥିବା ଯନ୍ତ୍ରୀଙ୍କ ସମ୍ପର୍କୀୟଙ୍କ ଘରେ ମଧ୍ୟ ଚଢାଉ ଜାରି ରଖିଛି ଭିଜିଲାନ୍ସ ଟିମ ।
ତେବେ ଏହି ଚଢ଼ାଉରେ ଭିଜିଲାନ୍ସ ଟିମର ଦୁଇ 2 ଏଏସପି, 3 ଜଣ ଡିଏସପିଙ୍କ ସମେତ ଅନ୍ୟ ଭିଜିଲାନ୍ସ ଅଫିସର ଓ କର୍ମଚାରୀମାନେ ସାମିଲ ଅଛନ୍ତି । ସେପଟେ ଭିଜିଲାନ୍ସ ବିଭାଗ ପକ୍ଷରୁ ବର୍ତ୍ତମାନ ସୁଦ୍ଧା ଚଢ଼ାଉ ପ୍ରକ୍ରିୟା ଜାରି ରହିଛି । ଏହି ପ୍ରକ୍ରିୟା ଶେଷ ହେବା ପରେ ସମସ୍ତ ତଥ୍ୟ ପ୍ରଦାନ କରାଯିବ ବୋଲି ଭିଜିଲାନ୍ସ ବିଭାଗ ପକ୍ଷରୁ ସୂଚନା ମିଳିଛି । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ସହକାରୀ ଯନ୍ତ୍ରୀ ଭିଜିଲାନ୍ସ ସ୍କାନରକୁ ଆସିଛନ୍ତି । ପୂର୍ବରୁ ମଧ୍ୟ ଆୟ ବହିର୍ଭୂତ ସମ୍ପତ୍ତି ଠୁଳ ନେଇ ଅନେକ ସରକାରୀ ଅଧିକାରୀ ଭିଜିଲାନ୍ସ ସ୍କାନରକୁ ଆସିଥିବାର ନଜିର ରହିଛି ।
ଇଟିଭି ଭାରତ, ମୟୂରଭଞ୍ଜ
