ରାଇରଙ୍ଗପୁର: ମୟୂରଭଞ୍ଜ ରରୁଆଁ ବ୍ଳକର ରରୁଆଁ ଓ ଘାଗରବେଡା ପଞ୍ଚାୟତକୁ 13 ତାରିଖ ଠାରୁ 17 ତାରିଖ ପର୍ଯ୍ୟନ୍ତ ସଟଡାଉନ୍ ଘୋଷଣା କରିଛନ୍ତି ଦୁଇ ପଞ୍ଚାୟତର ସରପଞ୍ଚ l ସ୍ଥାନୀୟ ଅଞ୍ଚଳରେ ଗୋଟିଏ ଦିନରେ 7 ପଜିଟିଭ ବାହାରିବା ପରେ ସ୍ଥାନୀୟ ପ୍ରଶାସନ ଓ ସ୍ଥାନୀୟ ପୋଲିସ ସହ ଆଲୋଚନା ପରେ ସମଗ୍ର ପଞ୍ଚାୟତକୁ 5 ଦିନ ପାଇଁ ସଟଡାଉନ ଘୋଷଣା କରାଯାଇଛି ।
ତେବେ 13 ଓ 14 ତାରିଖ ସକାଳ 6 ଟାରୁ ରାତି 9 ଟା ପର୍ଯ୍ୟନ୍ତ କେବଳ ମେଡ଼ିସିନ୍ ଓ କ୍ଷୀର ଦୋକାନକୁ ବାଦ ଦେଲେ କୌଣସି ଦୋକାନ ଖୋଲାଯିବ ନାହିଁ । ଏହାଛଡା 15 ରୁ 17 ତାରିଖ ସାମାନ୍ୟ କହଳ କରି ଗ୍ରୋସରି ଦୋକାନ ଦିନରେ 3 ଘଣ୍ଟା ସକାଳ 7 ରୁ 10 ଟା ପର୍ଯ୍ୟନ୍ତ ଖୋଲିବ ବୋଲି ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଏନେଇ ବ୍ୟାପକ ସଚେତନତା କରାଯାଇଛି । କୋଭିଡ୧୯ କାରଣରୁ ସାମାଜିକ ଦୂରତ୍ବ ବଜାୟ ରଖିବା ଏବଂ ମାସ୍କ ପରିଧାନ କରିବା ନେଇ ପ୍ରଶାସନ ତୀକ୍ଷ୍ମ ନଜର ରଖିଛି । ଜରୁରୀ କାମ ନଥିଲେ ଘରୁ ବାହାରକୁ ବାହାରିବେ ନାହିଁ । ଲୋକେ ଭୟଭୀତ ନହୋଇ ସାମାଜିକ ଦୂରତା ସହ ସମସ୍ତେ ମାସ୍କ ପିନ୍ଧିବା ଜରୁରୀ ବୋଲି ପ୍ରଚାର କରାଯାଇଛି ।
ସଙ୍ଗୋରୋଧ କେନ୍ଦ୍ରରୁ ଫେରି ହୋମ୍ କ୍ଵାରେଣ୍ଟାଇନରେ ଥିବା କିଛି ପ୍ରବାସୀ ଓଡ଼ିଆଙ୍କ ସ୍ବାସ୍ଥ୍ୟ ପରୀକ୍ଷା ପରେ ସେମାନଙ୍କ କୋରୋନା ପଜିଟିଭ ବାହାରିଥିଲେ । ସେମାନଙ୍କୁ ବାଙ୍କିଶୋଳ ସ୍ଥିତ କିମ୍ସ କୋଭିଡ ହୋସ୍ପିଟାଲ ସ୍ଥାନାନ୍ତର କରାଯାଇଥିବା ପ୍ରଶାସନ ତରଫରୁ ସୂଚନା ମିଳିଛି l ତେବେ ରରୁଆଁ ପଞ୍ଚାୟତ କାର୍ଯ୍ୟାଳୟ ବ୍ଲକ ମୁଖ୍ୟାଳୟ ନିକଟରେ ହୋଇ ଥିବାରୁ ଏଠାରେ ସବୁ ସମୟରେ ଭିଡ ଜମି ରହିଥାଏ l ସଟଡାଉନକୁ ନଜରରେ ରଖି ପୋଲିସ ମଧ୍ୟ ପେଟ୍ରୋଲିଂକୁ କଡାକଡି କରିଥିବା ଦେଖିବାକୁ ମିଳିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
