ବାରିପଦା: ଆଦିବାସୀ ଅଧ୍ୟୁଷିତ ଜିଲ୍ଲା ମୟୂରଭଞ୍ଜର ଏ ହେଉଛନ୍ତି ଲୋଧା ସମ୍ପ୍ରଦାୟ । ସମାଜର ମୁଖ୍ୟସ୍ରୋତରେ ଏହି ଆଦିମ ଜନଜାତିଙ୍କୁ ସାମିଲ କରିବା ପାଇଁ ସରକାର ଅନେକ ପଦକ୍ଷେପ ନେଇଛନ୍ତି । ବିଶେଷ କରି ଲୋଧା ସମ୍ପ୍ରଦାୟର ମହିଳାଙ୍କୁ ସ୍ବାବଲମ୍ବୀ କରିବା ପାଇଁ ଜିଲ୍ଲାରେ ଚାଲିଛି ପ୍ରୟାସ ।
ସବାଇ ଘାସରୁ ସୌଖିନ ସାମଗ୍ରୀ ପ୍ରସ୍ତୁତ ପାଇଁ ଦିଆଯାଉଛି ସ୍ବତନ୍ତ୍ର ତାଲିମ। ଆଉ ଘରେ ବସି ଫୁଲଦାନୀ, ଫୁଲତୋଡା, ପାପୋଛ, ପେନଷ୍ଟାଣ୍ଡ, ଟୋପି ସହ ଅନେକ ସୌଖିନ ସାମଗ୍ରୀ ପ୍ରସ୍ତୁତ କରି ରୋଜଗାରକ୍ଷମ ହୋଇପାରିଛନ୍ତି ମହିଳା । ପଶ୍ଚିମବଙ୍ଗ ସୀମାନ୍ତ ମୟୂରଭଞ୍ଜ ଜିଲ୍ଲା ଶୁଳିଆପଦା ବ୍ଲକ ଗଙ୍ଗାଷୋଳ ଗାଁରେ ବସବାସ କରନ୍ତି ଲୋଧା ସମ୍ପ୍ରଦାୟ। ଜିଲ୍ଲାରେ ସବାଇ ଘାସର ଚାହିଦା ଥିବାରୁ ଓଡିଶା ଆଦିମ ଜନଜାତି ସଶକ୍ତିକରଣ ଓ ଜୀବିକା ଉନ୍ନତିକରଣ କାର୍ଯ୍ୟକ୍ରମରେ ଏହି ଲୋଧା ମହିଳାଙ୍କୁ ଦିଆଯାଉଛି ତାଲିମ। ପ୍ରଥମ ପର୍ଯ୍ୟାୟରେ ୨୫ ଜଣ ଲୋଧା ମହିଳା ନେଇସାରିଛନ୍ତି ତାଲିମ । ଆଉ ମହିଳାମାନେ ବି ବେଶ ଆଗ୍ରହର ସହିତ ସବାଇ ଘାସରୁ ପ୍ରସ୍ତୁତ କରୁଛନ୍ତି ବିଭିନ୍ନ ସୌଖୀନ ସାମଗ୍ରୀ । ପ୍ରତିଦିନ ଚାରିରୁ ପାଞ୍ଚ ଘଣ୍ଟା ପରିଶ୍ରମ କରି ୨୦୦ ରୁ ୪୦୦ ଟଙ୍କା ପର୍ଯ୍ୟନ୍ତ ରୋଜଗାର କରୁଛନ୍ତି ଏମାନେ।
ସେପଟେ ମହାମାରୀ କୋରୋନା ପାଇଁ ପ୍ରସ୍ତୁତ କରିଥିବା ସାମଗ୍ରୀ ବିକ୍ରି ହୋଇ ପାରିନାହିଁ । ତେବେ ସରକାରଙ୍କ ଟିଡିସିସି ଓ ଓରମାସ ଜରିଆରେ ଏ ସବୁ ସାମଗ୍ରୀ ବିକ୍ରି କରିବାକୁ ଯୋଜନା ରଖିଛି ଲୋଧା ଉନ୍ନୟନ ସଂସ୍ଥା। ତେବେ ଆଗକୁ ଏହା କେତେଦୂର ଫଳପ୍ରଦ ହେଉଛି ତାହା ଦେଖିବାକୁ ବାକି ରହିଲା ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
