ରାଇରଙ୍ଗପୁର: କଲେଜରେ ପାଠ ପଢାଇବାକୁ ନାହାନ୍ତି ଅଧ୍ୟାପକ । ପାନୀୟ ଜଳଠାରୁ ଆରମ୍ଭ କରି ବିଭିନ୍ନ ସମସ୍ୟା ଘେରରେ ରହିଛି କଲେଜ । ଏନେଇ ଛାତ୍ରୀମାନେ ଉଚ୍ଚ ଅଧିକାରୀଙ୍କୁ ଅବଗତ କରାଇଲା ପରେ ମଧ୍ୟ କେହି ଶୁଣି ନାହାନ୍ତି । ଫଳରେ ବାଧ୍ୟ ହୋଇ ରାଜରାସ୍ତକୁ ଓହ୍ଲାଇଛନ୍ତି ମହିଳା ମହାବିଦ୍ୟାଳୟର ଛାତ୍ରୀ ।
ତେବେ ଏହିପରି ଘଟଣା ଘଟଛି ବାଦାମପାହାଡ଼ ଏସଏସଡି ଯୁକ୍ତ ଦୁଇ ବିଜ୍ଞାନ କଲେଜରେ । କଲେଜରେ ବିଭିନ୍ନ ଅବ୍ୟବସ୍ଥାକୁ ନେଇ ଓ ଅଧ୍ୟାପକଙ୍କ ସଂଖ୍ୟ କମ ଥିବାରୁ ଛାତ୍ରୀମାନେ ବାରମ୍ବାର ଉଚ୍ଚ ଅଧିକାରୀଙ୍କୁ ଜଣାଥିଲେ । ମାତ୍ର କୌଣସି ପଦକ୍ଷପ ନ ନିଆଯିବାରୁ କଲେଜର ଶତାଧିକ ଛାତ୍ରୀ ସ୍ଥାନୀୟ ୨୨୦ ନଂ ଜାତୀୟ ରାଜପଥକୁ ଅବରୋଧ କରିଛନ୍ତି ।
ସୋମବାର(ଆଜି) ପ୍ରାୟ ଅପରାହ୍ନ ସମୟରେ କଲେଜର ଶତାଧିକ ଛାତ୍ରୀମାନେ ଆସି ଜାତୀୟ ରାଜପଥ ଅବରୋଧ କରି ବସିଛନ୍ତି । ତେବେ ଜାତୀୟ ରାଜପଥ ଅବରୋଧ ହେବାରୁ ରାସ୍ତାର ଦୁଇପଟେ ଶହ ଶହ ଯାନବାହାନ ସବୁ ଅଟକି ଥିବା ଦେଖାଯାଇଛି । ଘଟଣା ସମ୍ପର୍କରେ ଖବର ପାଇ ବାଦାମପାହାଡ଼ ଥାନା ପୋଲିସ ଘଟଣାସ୍ଥଳରେ ପହଞ୍ଚି କଲେଜ ଛାତ୍ରୀମାନଙ୍କୁ ବୁଝାସୁଝା କରିଛନ୍ତି । ମାତ୍ର ଛାତ୍ରୀମାନେ ନିଜ ଜିଦରେ ଅଟଳ ଯୋଗୁଁ ବର୍ତ୍ତମାନ ସୁଦ୍ଧା ରାସ୍ତା ଅବରୋଧ ହଟି ନଥିବା ସୂଚନା ରହିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
