ବାରିପଦା: ଓଡିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ଦାବିରେ ପଦଯାତ୍ରାରେ ବାହାରିଛନ୍ତି ଜଣେ ଯୁବକ । ଉକ୍ତ ଯୁବକ ହେଉଛନ୍ତି ଜଗତସିଂପୁର ଜିଲ୍ଲା ବାଲିକୁଦା ବ୍ଲକ୍ ପରିଲ ପଞ୍ଚାୟତ ଭଗବାନ ସିନ୍ଧୁଲ ଗ୍ରାମର ସତ୍ୟବ୍ରତ ଦାସ । ଗତ ଜୁଲାଇ 10 ତାରିଖରେ ଯାଜପୁର ଜିଲ୍ଲା ବଡଚଣା ବ୍ଲକରୁ ପଦଯାତ୍ରା ଆରମ୍ଭ କରିଥିଲେ ସେ । ବର୍ତ୍ତମାନ ସୁଦ୍ଧା 42ଟି ବ୍ଲକ ଅତିକ୍ରମ କରି 43 ନମ୍ବର ମୋରଡା ବ୍ଲକରେ ପହଞ୍ଚିଛନ୍ତି ।
ସତ୍ୟବ୍ରତ ନାରୀ ସଚେତନତା, ବେକାରୀ ସମସ୍ୟା, ମହାନଦୀ ଜଳ ସମସ୍ୟାର ସମାଧାନ ଏବଂ ପୋଲାଭରମ ପ୍ରକଳ୍ପ ବନ୍ଦ କରିବା ଦାବିରେ ଓଡିଶାର 314ଟି ବ୍ଲକ ପରିକ୍ରମା କରିବାର ନିଷ୍ପତ୍ତି ନେଇଥିଲେ । ଏଥିସହିତ ପଦଯାତ୍ରା ସମୟରେ ପ୍ରତ୍ୟେକ ବ୍ଲକର ବିଡିଓଙ୍କୁ ଭେଟି ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସ୍ମାରକ ପତ୍ର ପ୍ରଦାନ କରିଛନ୍ତି । ଉକ୍ତ ଦାବି ଗୁଡିକୁ ପୂରଣ କରାନଗଲେ ଦିଲ୍ଲୀର ଯନ୍ତରମନ୍ତର ଠାରେ ଆମରଣ ଅନଶନ କରିବେ ବୋଲି ସତ୍ୟବ୍ରତ କହିଛନ୍ତି ।
ତେବେ ମୋରଡା ଠାରେ ମୋରଡା ପ୍ରେସ୍ କ୍ଲବ ପକ୍ଷରୁ ତାଙ୍କୁ ସମ୍ବର୍ଦ୍ଧନା ଦିଆଯାଇଛି । ପରେ ସ୍ଥାନୀୟ ଜନସାଧାରଣ ପହଞ୍ଚି ତାଙ୍କ ସହିତ ଆଲୋଚନା କରିଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
