ରାଇରଙ୍ଗପୁର: ଓଡିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା ମାନ୍ୟତା ସହ 3ଟି ଦାବି ନେଇ ପଦଯାତ୍ରା ଆରମ୍ଭ କରିଥିଲେ ଜଗତସିଂହପୁର ଜିଲ୍ଲା ପରିଲ ପଞ୍ଚାୟତର ସତ୍ୟବ୍ରତ ଦାସ । ଗତ ଜୁଲାଇ 20 ତାରିଖରୁ ସେ ଯାଜପୁର ଜିଲ୍ଲା ବଡ଼ଚଣାରୁ ନିଜର ପଦଯାତ୍ରା ଆରମ୍ଭ କରିଥିଲେ ।
ଓଡିଶାକୁ ସ୍ବତନ୍ତ୍ର ରାଜ୍ୟ ପାହ୍ୟା, ମହାନଦୀ ଜଳ ବିବାଦର ସମାଧାନ ଏବଂ ପୋଲାଭରମ ପ୍ରକଳ୍ପ ବନ୍ଦ ହେବା ନେଇ ସେ ଏହି ପଦଯାତ୍ରାରେ ବାହାରିଥିଲେ । ଏହି କ୍ରମରେ ସତ୍ୟବ୍ରତ ଆଜି ମୟୂରଭଞ୍ଜ ଜିଲ୍ଲାର ବିଜାତଳା ବ୍ଲକରେ ପହଞ୍ଚିଥିଲେ । ସେଠାରେ ବିଡିଓଙ୍କ ଅନୁପସ୍ଥିତିରେ ମୁଖ୍ୟ କିରାଣୀ ମହାଦେବ ସିଂଙ୍କୁ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଥିଲେ । ତେବେ ସତ୍ୟବ୍ରତଙ୍କୁ ବିଜାତଳାରେ ମୟୂରଭଞ୍ଜ ମୁକ୍ତି ମୋର୍ଚ୍ଚାର ପ୍ରମୁଖ ସଦସ୍ୟମାନେ ସ୍ବାଗତ କରିବା ସହିତ କିଛି ସମୟ ତାଙ୍କ ସହ ଆଲୋଚନା କରିଥିଲେ । ଏଥିସହିତ ତାଙ୍କ ଦାବିଙ୍କୁ ସମ୍ମାନ ଜଣାଇଥିଲେ ।
ବର୍ତ୍ତମାନ ସୁଦ୍ଧା ଅର୍ଥାତ ପଦଯାତ୍ରାର ୬୩ ଦିନରେ ସତ୍ୟବ୍ରତ ୫୮ଟି ବ୍ଲକ ଦେଇ ଯାତ୍ରା କରିସାରିଲେଣି । ଏହି ପଦଯାତ୍ରା ଜରିଆରେ ସେ ଜନସଚେତନତା ସୃଷ୍ଟି କରିବା ସହିତ ସରକାରଙ୍କୁ ଚେତାଇବା ତାଙ୍କ ଉଦ୍ଦେଶ୍ୟ କହିଛନ୍ତି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
