ରାଇରଙ୍ଗପୁର: ସ୍ବାଧୀନତା ସଂଗ୍ରାମୀ ତଥା ସାନ୍ତାଳୀ ସମ୍ପ୍ରଦାୟର ଭଗବାନ ବିର୍ସା ମୁଣ୍ଡାଙ୍କ ୧୪୮ ତମ ଜୟନ୍ତୀ ପାଳନ । ଏହି ଅବସରରେ ରାଇରଙ୍ଗପୁର ବ୍ଲକ ପଡିଆ ଠାରେ 'ବିଚ୍ଛିନ୍ନାଞ୍ଚଳ ଝାରଖଣ୍ଡ ଆଦିବାସୀ ମୂଳବାସୀ ମଞ୍ଚ' ତରଫରୁ ଆଦିବାସୀ ମୂଳବାସୀ ସ୍ବାଭିମାନ ସମାବେଶ ଅନୁଷ୍ଠିତ ହୋଇଯାଇଛି । ଏନେଇ ମୟୂରଭଞ୍ଜ ଜିଲ୍ଲାର ପୂର୍ବତନ ସାଂସଦ ଇଂ ରାମଚନ୍ଦ୍ର ହାଁସଦାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମାବେଶରେ ମୁଖ୍ୟ ଅତିଥି ଭାବେ ଆସାମ କୋକ୍ରାଝର ସାଂସଦ ନବ କୁମାର ସରନିଆ ଯୋଗ ଦେଇଥିଲେ । ଏଥିସହ ମୁଖ୍ୟ ବ୍ୟକ୍ତା ଭାବେ ଆଜସୁ ଏବଂ ଜେପିପିର ପ୍ରତିଷ୍ଠାତା ସୂର୍ଯ୍ୟ ସିଂ ବେଶ୍ରା, ସମ୍ମାନିତ ଅତିଥି ଭାବେ ଆଜସୁ ଦଳର ମୁଖପାତ୍ର ଡଃ ଦେବସରଣ ଭଗତ ଓ ରାଞ୍ଚି ବିଶ୍ବ ବିଦ୍ୟାଳୟର ରେଜିଷ୍ଟ୍ରାର ମୁକୁନ୍ଦ ମହାନ୍ତ ଯୋଗ ଦେଇଥିଲେ।
ତେବେ ଖଣିଖାଦାନ ପୁର୍ଣ୍ଣ ଆଦିବାସୀ ବହୁଳ ମୟୂରଭଞ୍ଜ ଜିଲ୍ଲାକୁ ଅବହେଳା, ଶୋଷଣ କରୁଥିବା ଅଭିଯୋଗ କରି ରାଜ୍ୟ ସରକାରଙ୍କ ଉପରେ ବର୍ଷିଥିଲା ଝାରଖଣ୍ଡ ଆଦିବାସୀ ମୂଳବାସୀ ମଞ୍ଚ । ଆୟୋଜିତ ଆଦିବାସୀ ମୂଳବାସୀ ସ୍ବାଭିମାନ ସମାବେଶରେ ବିଚ୍ଛିନ୍ନାଞ୍ଚଳ ଝାରଖଣ୍ଡ ଆଦିବାସୀ ମୂଳବାସୀ ମଞ୍ଚ ତରଫରୁ ରାଜ୍ୟ ସରକାରଙ୍କ ନିକଟରେ ବିଭିନ୍ନ ଦାବି ରଖା ଯାଇଥିଲା ।
ସେଥି ମଧ୍ୟରୁ ସାନ୍ତାଳୀ ଓ ମୁଣ୍ଡାରୀ ଭାଷା ଶିକ୍ଷକ ମାନଙ୍କୁ ନିୟମିତ କରିବା ସହିତ ପ୍ରାଥମିକ ସ୍ତରରୁ ସାନ୍ତାଳୀ ମିଡିୟମରେ ପାଠପଢା ବ୍ୟବସ୍ଥା କରିବା, ବହୁଭାଷୀ ଶିକ୍ଷା ବ୍ୟବସ୍ଥାରେ ନିଜସ୍ଵ ଲିପି ଥିବା ମୁଣ୍ଡାରୀ ଭାଷାର ମୁଣ୍ଡାରୀବାଣୀ ଓ ହୋ ଭାଷାର ୱରାଂଚିତିରେ ପାଠ ପଢାକୁ ନିୟମିତ କରାଯିବା, ରାଜ୍ୟରେ ପଛୁଆବର୍ଗଙ୍କ ପାଇଁ ଉଚ୍ଚ ଶିକ୍ଷା ଓ ସରକାରୀ ଚାକିରିରେ ଥିବା ୧୧.୨୫ ପ୍ରତିଶତ ସଂରକ୍ଷଣ ବ୍ୟବସ୍ଥାକୁ ବୃଦ୍ଧି କରି ଅନ୍ୟୂନ ୨୭ ପ୍ରତିଶତ ବୃଦ୍ଧି କରାଯିବା, ଓମବାଡସି ଓ ଡିଏମଏଫ ପାଣ୍ଠିକୁ ଜିଲ୍ଲାର ଆଦିବାସୀ ମୂଳବାସୀ ମାନଙ୍କର ବିକାଶ ପାଇଁ ଖର୍ଚ୍ଚ କରାଯିବା, ୫ମ ଅନୁସୂଚିତ ଅଞ୍ଚଳରେ ଖଣି ଓ କାରଖାନା ପାଇଁ ଜମି ଅଧିଗ୍ରହଣ ପ୍ରକ୍ରିୟା ଆରମ୍ଭ ପୂର୍ବରୁ ଗ୍ରାମ ସଭାର ଅନୁମତିକୁ ଅନିବାର୍ଯ୍ୟ କରାଯାଉ ବୋଲି ବିଚ୍ଛିନ୍ନାଞ୍ଚଳ ଝାରଖଣ୍ଡ ଆଦିବାସୀ ମୂଳବାସୀ ମଞ୍ଚ ତରଫରୁ ଦାବି ହୋଇଥିଲା । ଏନେଇ ବହୁ ସଂଖ୍ୟାରେ ପୁରୁଷ ଓ ମହିଳା ଏହି ସମାବେଶରେ ଉପସ୍ଥିତ ଥିବା ବେଳେ ପରିଶେଷରେ ଆଦିବାସୀ ପାରମ୍ପରିକ ନୃତ୍ୟଗୀତ ପରିବେଷଣ କରାଯାଇଥିଲା ।
ଇଟିଭି ଭାରତ, ରାଇରଙ୍ଗପୁର
