ବାରିପଦା: ଦେଶରେ ଗରିବଙ୍କ ପାଇଁ କେନ୍ଦ୍ର ସରକାର ଆରମ୍ଭ କରିଥିଲେ ପ୍ରଧାନମନ୍ତ୍ରୀ ଆବାସ ଯୋଜନା । 2015 ରେ ଏହି ଯୋଜନା ଆରମ୍ଭ ହୋଇଥିବା ବେଳେ ଓଡ଼ିଶାରେ ମଧ୍ୟ ଏହି ଯୋଜନା କାର୍ଯ୍ୟକାରୀ ହୋଇଛି । ଆଦିବାସୀ ବହୁଳ ମୟୂରଭଞ୍ଜ ଜିଲ୍ଲାରେ ମଧ୍ୟ ଏହି ଯୋଜନାରେ ନିର୍ମାଣ ହୋଇଛି ଘର । ହେଲେ ପ୍ରକୃତ ହିତାଧିକାରୀ ଏଯାଏଁ ଘର ଖଣ୍ଡିଏ ନପାଇ ଦୁର୍ଦ୍ଦିନରେ ଦିନ କାଟୁଛନ୍ତି ।
କିଏ ଭଙ୍ଗା ଦଦରା ଚାଳ ଘରେ ପଡି ରହିଛି ତ ଆଉ କିଏ ପାଇଖାନାରେ କାଟୁଛି ଜୀବନ । ସେପଟେ ଏହି ଯୋଜନାରେ ଅନେକଙ୍କୁ ଘର ମିଳିଥିଲେ ବି ଅସମ୍ପୂର୍ଣ୍ଣ ଭାବେ ପଡି ରହିଛି । ଏହାସହ ଘର ପାଇଥିବା ଗରିବ ଆଦିବାସୀ ହିତାଧିକାରୀ ଦଲାଲଙ୍କ ହାବୁଡ଼ରେ ପଡି ଲୁଟର ଶିକାର ହେଉଥିବା ମଧ୍ୟ ଅଭିଯୋଗ ହେଇଛି ।
ପ୍ରଧାନମନ୍ତ୍ରୀ ଆବାସ ଯୋଜନାରେ ଆଦିବାସୀ ବହୁଳ ମୟୂରଭଞ୍ଜ ଜିଲ୍ଳାରେ ମୋଟ ୨୬ ଟି ବ୍ଲକକୁ ୨୦୨୦-୨୧ ଆର୍ଥିକ ବର୍ଷ ସୁଦ୍ଧା ୨,୩୧,୪୪୧ ଟି ଗୃହ ନିର୍ମାଣ ପାଇଁ ଟାର୍ଗେଟ ରହିଥିଲା । ତେବେ ୨୦୧୬-୨୦୨୧ ଆର୍ଥିକ ବର୍ଷ ସୁଦ୍ଧା ୨୬ ଟି ବ୍ଲକରେ ମୋଟ ୧,୪୧,୧୬୯ ଟି ଗୃହ ନିର୍ମାଣ ହୋଇଥିବା ଅନ ଲାଇନରେ ଉପଲବ୍ଧ ତଥ୍ୟ କହୁଛି ।
ତେବେ ଏହି ଯୋଜନାରେ ପ୍ରକୃତ ହିତାଧିକାରୀ ଘର ପାଇ ନଥିବା ବେଳେ ଅନେକ ଧନୀ ଶ୍ରେଣୀର ଲୋକେ ଏହି ଯୋଜନାରେ ସାମିଲ ହୋଇ ଯୋଜନାର ଲାଭ ନେଇଛନ୍ତି ବୋଲି ଆଦିବାସୀ ଦଳିତ ମହାସଂଘର ସଭାପତି ଅଭିଯୋଗ କରିଛନ୍ତି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
