ବାରିପଦା: ମୟୂରଭଞ୍ଜରେ ଲଜ୍ଜା। ବିବାହିତା ମହିଳାଙ୍କୁ ମାରଣାସ୍ତ୍ର ଦେଖାଇ ଦୁଷ୍କର୍ମ ଅଭିଯୋଗ । ଜିଲ୍ଲାର ବିଶୋଇ ଥାନା ଅଞ୍ଚଳରେ ଘଟିଛି ଏପରି ଲଜ୍ଜାଜନକ ଘଟଣା । ଏନେଇ ଥାନାରେ ଅଭିଯୋଗ ପରେ ପୋଲିସ ଅଭିଯୁକ୍ତକୁ ଗିରଫ କରିଛି । ଅଭିଯୁକ୍ତ ଜଣକ ହେଉଛି ମୋହନ ମାଝି ।
ସୂଚନା ଅନୁଯାୟୀ, ବିଶୋଇ ଥାନା ଅଞ୍ଚଳର ଜନୈକ ବିବାହିତା ମହିଳା ଶାଶୁ ଘରେ ରହୁଥିବା ବେଳେ ତାଙ୍କ ସ୍ବାମୀ ତାମିଲନାଡୁରେ ରୁହନ୍ତି । ଗତ ମଙ୍ଗଳବାର ସନ୍ଧ୍ୟା ସମୟରେ ଜନୈକ ମହିଳାଙ୍କ ଶାଶୁ ଓ ଶ୍ୱଶୁର ନିକଟସ୍ଥ ପଡୋଶୀ ଘରକୁ ଯାଇଥିଲେ । ଏହି ସମୟରେ ପୀଡିତା ମହିଳା ଦୁଇ ପିଲାଙ୍କ ସହିତ ଘରେ ଥିଲେ । ଏହାପରେ ମହିଳା ଜଣକ ଶୌଚ ପାଇଁ ବାହାରକୁ ଯାଇଥିବା ବେଳେ ନିଶାସକ୍ତ ଅବସ୍ଥାରେ ମୋହନ ମାଝି ନାମକ ଯୁବକ ତାଙ୍କୁ ମାରଣାସ୍ତ୍ର ଦେଖାଇ ପ୍ରଥମେ ଭୟଭୀତ କରିଥିଲା । ଏହାପରେ ଦୁଷ୍କର୍ମ କରିଥିବା ଅଭିଯୋଗ ହୋଇଛି ।
କିନ୍ତୁ ଲୋକ ଲଜ୍ଜା ଭୟରେ ମହିଳା ଜଣକ ଏହି ଘଟଣାକୁ ପ୍ରଘଟ କରିନଥିଲେ । କିଛିଦିନ ପରେ ମହିଳାଙ୍କ ସ୍ବାମୀ ତାମିଲନାଡୁରୁ ଗ୍ରାମକୁ ଫେରିବା ପରେ ସେ ଘଟଣା ସମ୍ପର୍କରେ ତାଙ୍କୁ ଅବଗତ କରାଇଥିଲେ । ଏହା ଜାଣିବାପରେ ବିଶୋଇ ଥାନା ପୋଲିସ ନିକଟରେ ମହିଳା ଜଣକ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିବା ସହିତ ଅଭିଯୁକ୍ତ ମୋହନ ମାଝିକୁ ଗିରଫ କରିଛି । ତେବେ ଅଭିଯୁକ୍ତର ଡାକ୍ତରୀ ପରୀକ୍ଷା ପରେ ରାଇରଙ୍ଗପୁର କୋର୍ଟ ଚାଲାଣ କରାଯାଇଥିବା ବିଶୋଇ ଥାନା ପୋଲିସ ସୂଚନା ଦେଇଛି ।
ଏହା ମଧ୍ୟ ପଢନ୍ତୁ-ବିଲାମାଲ ଗାଁକୁ ବାଟ ଭୁଲିଛି ବିକାଶ: ମିଳୁନି ମୌଳିକ ସୁବିଧା, ହନ୍ତସନ୍ତ ଲୋକେ
ନିକଟରେ ରାଉରକେଲାରେ ଜଣେ ମାନସିକ ଅସୁସ୍ଥ ଥିବା ନାବାଳିକାକୁ କେହି ଦୁର୍ବୃତ୍ତ ଦୁଷ୍କର୍ମ କରିଥିବା ଅଭିଯୋଗ ସାମ୍ନାକୁ ଆସିଥିଲା । ଶେଷରେ ନାବାଳିକା ଜଣଙ୍କ ୮ ମାସର ଗର୍ଭବତୀ ଥିବା ଜଣାପଡିବା ପରେ ଥାନାରେ ଅଭିଯୋଗ କରିଥିଲେ ପରିବାର ଲୋକେ । ପୀଡିତା ଜଣଙ୍କ ପିଲା ବେଳୁ ମାନସିକ ଅସୁସ୍ଥ । ଏହାର ଫାଇଦା ଉଠାଇ କେହି ଦୁର୍ବୃତ୍ତ ନାବାଳିକା ସହ ଦୁଷ୍କର୍ମ କରିଛି । ଯାହା ଫଳରେ ନାବାଳିକା ଝିଅଟି ବର୍ତ୍ତମାନ ଆଠ ମାସର ଗର୍ଭବତୀ ହୋଇଥିବା ଘଟଣା ସାମ୍ନାକୁ ଆସିଥିଲା । ସେହିପରି ଜାନୁଆରୀ ମାସରେ ପୁରୀରେ ଜଣେ ଦିବ୍ୟାଙ୍ଗ ନାବାଳିକାଙ୍କୁ ଦୁଷ୍କର୍ମ ଅଭିଯୋଗ ହୋଇଥିଲା । ଦିବ୍ୟାଙ୍ଗ ନାବାଳିକାଙ୍କୁ ଦୁଷ୍କର୍ମ ଅଭିଯୋଗରେ ପୀଡିତାଙ୍କ ବାଡବାପା ପୁଅ ଅଟକ ଥିବା ପୋଲିସ ପକ୍ଷରୁ ସୂଚନା ମିଳିଛି ।
ଇଟିଭି ଭାରତ, ମୟୂରଭଞ୍ଜ
