ବାରିପଦା: ଆରମ୍ଭ ହୋଇଯାଇଛି ପିକନିକ ଋତୁ । ପ୍ରତିବର୍ଷ ଭଳି ଏବର୍ଷ ବି ଶିମିଳିପାଳ ଅଭୟାରଣ୍ୟରେ ଭିଡ ଜମାଇଛନ୍ତି ପର୍ଯ୍ୟଟକ । ଶିମିଳିପାଳର ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବାକୁ ରାଜ୍ୟ ଓ ପଡୋଶୀ ରାଜ୍ୟର ପର୍ଯ୍ୟଟକ ଏଠାକୁ ଛୁଟି ଆସିଛନ୍ତି । ଘଞ୍ଚ ଜଙ୍ଗଲ, ବନ୍ୟଜନ୍ତୁ ସାଙ୍ଗକୁ ଅଭୟାରଣ୍ୟ ଭିତରେ ଥିବା ବରେହିପାଣି, ଉସୁକି, ଜୋରନ୍ଦା ଜଳପ୍ରପାତର ମନଭରି ମଜା ନେଉଛନ୍ତି ପର୍ଯ୍ୟଟକ ।
ସେହିପରି ପର୍ଯ୍ୟଟକଙ୍କ ପାଇଁ ରାଜ୍ୟ ସରକାରଙ୍କ ପକ୍ଷରୁ ସମସ୍ତ ପ୍ରକାର ବ୍ୟବସ୍ଥା କରାଯାଇଛି । ଏଠାରେ ରାତ୍ରିଯାପନ କରିବାକୁ ହେଲେ www.ecotourodisha.comରେ ଲଗଇନ କରି ଅଗ୍ରିମ ବୁକିଂ ମଧ୍ୟ କରିପାରିବେ ପର୍ଯ୍ୟଟକ । ତା' ସହିତ ଅଭୟାରଣ୍ୟ ଭିତରେ ସରକାରୀ କ୍ୟାଣ୍ଟିନର ମଧ୍ୟ ବ୍ୟବସ୍ଥା ରହିଛି । ବାରିପଦା ପିଠାବଟା ଓ ଜଶିପୁର କାଳିଆଣିରେ ପ୍ରବେଶ ସମୟରେ ଭୋଜନ ପାଇଁ ବୁକିଂ କଲେ ବରେହିପାଣିରେ ଖାଦ୍ୟ ସାମଗ୍ରୀ ପାଇପାରିବେ ପର୍ଯ୍ୟଟକ । ଅନ୍ୟପଟେ ଶିମିଳିପାଳକୁ ପର୍ଯ୍ୟଟକଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଉଥିବାରୁ ସେଠାରେ ଥିବା ରାସ୍ତାର ଉନ୍ନତି ପାଇଁ ଦାବି କରିଛନ୍ତି ଟୁରିଷ୍ଟ ଗାଇଡମାନେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
