ବାରିପଦା: ରୋଗୀ ହୋଇ ଆସିଲେ, ଚୋର ହୋଇ ଲୁଟିଲେ । ଏଭଳି ଅଭିନବ ଉପାୟରେ ଚୋରି ହୋଇଛି ରାସଗୋବିନ୍ଦପୁର ଥାନା ତୋଟାପଡା ଚିକିତ୍ସାଳୟରେ । ଗଛ ଡା଼ଳ ପଡ଼ି ହାତ ଭାଙ୍ଗିଯାଇଥିବା ନେଇ ଦୁଇ ଜଣ ବ୍ୟକ୍ତି ତୋଟାପଡା ଡାକ୍ତରଖାନାକୁ ଆସି ଫାର୍ମାସିଷ୍ଟ ସଞ୍ଜୁରାଣୀ ସାହୁଙ୍କୁ କହିଥିଲେ । ସଞ୍ଜୁରାଣୀ ସଙ୍ଗେ ସଙ୍ଗେ ଡ଼ାକ୍ତରଖାନାରେ ଚିକିତ୍ସା ଆରମ୍ଭ ମଧ୍ୟ କରିଥିଲେ । ଠିକ୍ ଏହି ସମୟରେ ରୋଗୀ ଫାର୍ମାସିଷ୍ଟଙ୍କ ବେକରୁ ସୁନା ହାର ଛିଣ୍ଡାଇ ଦୌଡ଼ି ପଳାଇଥିଲା ।
ରବିବାର ସଂନ୍ଧ୍ୟାରେ ପବନ ବର୍ଷା ହୋଇ କରେଣ୍ଟ କଟିଯାଇଥିଲା । ଡ଼ାକ୍ତରଖାନା ପରିସର ଅନ୍ଧାର ଥିବା ସମୟରେ ଦୁଇ ଲୁଟେରା ଚିକିତ୍ସା ବାହାନାରେ ଆସି ଘଟାଇଥିଲେ ଏପରି ଲୁଟପାଟ୍ । ପ୍ରଥମ ରୋଗୀ ଜଣଙ୍କ ସଞ୍ଜୁରାଣୀଙ୍କ ବେକରୁ ଚେନ୍ ନେଇ ପଳାଇବା ପରେ ଦ୍ବିତୀୟ ଜଣଙ୍କ ମଧ୍ୟ ଦୌଡ଼ି ପଳାଇଥିଲେ । ଫାର୍ମାସିଷ୍ଟଙ୍କ ଚିତ୍କାର ଶୁଣି ଡାକ୍ତରଖାନାରେ ଥିବା ସୁରକ୍ଷାକର୍ମୀ
ଆସିଲାବେଳକୁ ଚୋର ଦ୍ବୟ ଫେରାର ହୋଇଯାଇଥିଲେ ।
ଲୁଟେରା ଦୁଇଜଣ ଦୌଡି ପଳାଇ ଯାଉଥିବା ସମୟରେ ସ୍ଥାନୀୟ ଲୋକେ ଦୁଇଜଣଙ୍କ ମଧ୍ୟରୁ ଜଣଙ୍କୁ ଚିହ୍ନିପାରି ଫାର୍ମାସିଷ୍ଟଙ୍କୁ କହିଥିଲେ । ପରେ ଫାର୍ମାସିଷ୍ଟ ସଞ୍ଜୁରାଣୀ ରାସଗୋବିନ୍ଦପୁର ଥାନାକୁ ଏ ବାବଦରେ ଜଣାଇଥିଲେ । ତେବେ ସୋମବାର ରାସଗୋବିନ୍ଦପୁର ପୋଲିସ ସଦଳବଳେ ତେନ୍ତୁଳିଗାଁରେ ପହଞ୍ଚି ସୂଚନା ମୁତାବକ ପ୍ରଥମେ ଅବିନାଶ ଦେହୁରୀଙ୍କ ଘରେ ପହଞ୍ଚି ଅବିନାଶକୁ ନିଜ କବଜାକୁ ଆଣି ପଚରାଉଚରା କରିଥିଲା । ଘଟଣା ବିଷୟରେ ଅଭିଯୁକ୍ତ ଅବିନାଶ ମାନିଯିବା ପରେ ତା ଠାରୁ ସୁନା ଚେନ ଜବତ କରିବା ସହ ସହଯୋଗୀ ସୁଶାନ୍ତ ଦଳେଇକୁ ମଧ୍ୟ ଗିରଫ କରିଛି ପୋଲିସ ।
ପୋଲିସ ଏହି ଦୁଇଜଣଙ୍କ ସହିତ ଆଉ କିଏ ଜଡ଼ିତ ଅଛି ଜାଣିବା ପାଇଁ ଅଧିକ ତଦନ୍ତ ଆରମ୍ଭ କରି ଦଫା ୪୭/୧୯ରେ ଅଭିଯୁକ୍ତଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି ।
ମୟୁରଭଞ୍ଜରୁ ମୃତ୍ଯୁଞ୍ଜୟ ସେନାପତି, ଇଟିଭି ଭାରତ
