ମିଳିଥିବା ଖବର ଅନୁଯାୟୀ ଗୁରୁବାର ଆରପଟା ଗ୍ରାମପଞ୍ଚାୟତର ୨ ଜଣ ହିତାଧିକାରୀ ସ୍ୱରୂପ ନାୟକ ଓ ଦେବାଶିଷ ପୃଷ୍ଟି ବିଜୁପକ୍କା ଘର ପାଇଁ ଆରପଟା ଗ୍ରାମପଞ୍ଚାୟତର କାର୍ଯ୍ୟନିର୍ବାହୀ ଅଧିକାରୀ ଦାସମାତ ମୁର୍ମୁଙ୍କୁ ୫ ହଜାର ଟଙ୍କା ଲାଞ୍ଚ ଦେଉଥିବା ବେଳେ ଭିଜିଲାନ୍ସ ଦ୍ଵାରା ଗିରଫ ହୋଇଥିଲେ।
ଏହି ଘଟଣାର ଅନ୍ୟ ଏକ ଦିଗ ରହିଥିବା ଅଭିଯୋଗ କରିଛନ୍ତି ଆରପଟା ଗ୍ରାମପଞ୍ଚାୟତର ବାସିନ୍ଦା। ଗିରଫ ହୋଇଥିବା କାର୍ଯ୍ୟନିର୍ବାହୀ ଅଧିକାରୀ ଦାସମାତ ମାର୍ଣ୍ଡିଙ୍କୁ ଯୋଜନାବଦ୍ଧ ଭାବେ ଫସାଇ ଦିଆଯାଇଥିବା ସାଂଘାତିକ ଅଭିଯୋଗ କରିଛନ୍ତି ବାସିନ୍ଦା । ଜଣେ ସଚ୍ଚୋଟ ଅଫିସରଙ୍କୁ ଉଦ୍ଦେଶ୍ୟ ମୂଳକ ଭାବରେ ଫସାଇ ଦିଆଯାଇଥିବା ଅଭିଯୋଗ ଆଣିଛନ୍ତି ଗ୍ରାମବାସୀ ।
ଶହଶହ ଗ୍ରାମବାସୀ ନାରା ବାଜି କରିବା ସହ ଗ୍ରାମପଞ୍ଚାୟତରେ ତାଲା ପକାଇବା ସହ କରିଛନ୍ତି ରାସ୍ତାରୋକ । ଉଦଳା-ବାରିପଦା ମୁଖ୍ୟ ରାସ୍ତାକୁ ଦୀର୍ଘ ସମୟ ଧରି ବନ୍ଦ କରିଥିଲେ ଲୋକେ । ସେମାନଙ୍କ ଦାବି ଯେ ଗିରଫ କାର୍ଯ୍ୟନିର୍ବାହୀ ଅଧିକାରୀ ଦାସମାତ ମାର୍ଣ୍ଡିଙ୍କୁ ମୁକୁଳାଯାଉ ଓ ସ୍ୱରୂପ ନାୟକ ଓ ଦେବାଶିଷ ପୃଷ୍ଟିଙ୍କୁ ଗିରଫ କରାଯାଉ।
ଜଣାଯାଇଛି ଯେ ଦୀର୍ଘ ସମୟ ଧରି ରାସ୍ତା ଅବରୋଧ ଫଳରେ ଉଦଳା-ବାରିପଦା ମୁଖ୍ୟ ରାସ୍ତାରେ ଗାଡି ମଟର ଚଳାଚଳ ବନ୍ଦ ରହିଥିଲା । ଫଳରେ ଯାତ୍ରୀ ନାନା ହଇରାଣ ହରକତ ହୋଇଥିବା ଦେଖିବାକୁ ମିଳିଥିଲା । ଘଟଣାସ୍ଥଳରେ ଖୁଣ୍ଟା ପୋଲିସ ପହଞ୍ଚି ଗ୍ରାମବାସୀଙ୍କ ସହ ଆଲୋଚନା ପରେ ରାସ୍ତାରୋକ ହଟିଥିବା ଖବର ମିଳିଛି ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
