ବାରିପଦା: ସ୍ମୃତି ଅନେକ । କିଛି ମନେ ରହେ ଆଉ କିଛି ମନେ ରହେନି । ତେବେ କିଛି ଅଭୁଲା ସ୍ମୃତି ମନରୁ ନଲିଭିବା ପାଇଁ ସ୍ଥାପନ କରାଯାଏ ପ୍ରତିମୃର୍ତ୍ତି ଓ ପ୍ରତିମା । ଆଉ ସେମାନଙ୍କ ସୃତିରେ ପାଳନ କରାଯାଏ ସ୍ମୃତିସଭା । ଶତ୍ରୃ ଉପରେ ସେନାର ପରାକ୍ରମ ବଳିଦାନକୁ ମନେ ପକାଇ ଦେଶ ଆଜି ପାଳନ କରୁଛି କାରଗିଲ ବିଜୟ ଦିବସ । କିନ୍ତୁ ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ନିକଟରେ ଥିବା ଅମରଦା ଏୟାର ଷ୍ଟ୍ରିପରେ ଦ୍ବିତୀୟ ବିଶ୍ଵଯୁଦ୍ଧ ସମୟରେ ଶହୀଦ ହୋଇଥିବା 14 ଜଣ ଯବାନଙ୍କ ପାଇଁ ପାଳନ ହୋଇଛି ସ୍ମୃତିସଭା ।
1945 ମସିହା ଦ୍ବିତୀୟ ବିଶ୍ଵଯୁଦ୍ଧ ସମୟରେ ଘଟିଥିବା ବିମାନ ଦୁର୍ଘଟଣା ଏବେ ଇତିହାସ ଗବେଷକ ଅନୀଲ କୁମାର ଧିରଙ୍କ ଗବେଷଣାରେ ଇତିହାସର ରୂପ ନେଇଛି । 1945 ମସିହା ଜୁଲାଇ ମାସ 26 ତାରିଖରେ ଅମରଦା ଏୟାର ଷ୍ଟ୍ରିପରୁ ଉଡିଥିଲା 6ଟି ଯୁଦ୍ଧ ବିମାନ । ଅଳ୍ପ ଦୂର ଉଡିବା ପରେ ପଶ୍ଚିମବଙ୍ଗ ବେଳଦା ଅଞ୍ଚଳରେ 2ଟି ବିମାନ ମଧ୍ୟରେ ଧକ୍କା ହୋଇଥିଲା । ଫଳରେ ପ୍ରାଣ ହରାଇଥିଲେ 14 ଜଣ ସାମରିକ ପଦାଧିକାରୀ ।
ଏମାନଙ୍କ ମଧ୍ୟରେ ଥିଲେ ଜଣେ ଭାରତୀୟ । ତାଙ୍କ ଘର କେରଳରେ ଏବଂ ଅନ୍ୟ 13 ଜଣ ବିଦେଶର । ଇତିହାସ ଗବେଷକ ଅନୀଲ କୁମାର ଧିର ମୃତକଙ୍କ ଶବିଶେଷ ତଥ୍ୟ ସଂଗ୍ରହ କରି ସେମାନଙ୍କ ଉଦ୍ଦେଶ୍ୟରେ ଦୀର୍ଘ 8 ବର୍ଷ ହେବ ସ୍ମୃତିସଭା ଆୟୋଜନ କରୁଛନ୍ତି ଏହି ଅମରଦା ଏୟାର ଷ୍ଟ୍ରିପରେ । 6 ମାସ ଭିତରେ ଏହି ଅମରଦା ଏୟାର ଷ୍ଟ୍ରିପକୁ ମ୍ୟୁଜିଅମ କରିବକୁ ଲକ୍ଷ୍ୟ ଇତିହାସ ବଗେଷକ ଅନୀଲ କୁମାର ଧିର ଏବଂ ଶହୀଦ ଯବାନଙ୍କ ପରିବାରବର୍ଗ ।
ଅମରଦା ଏୟାର ଷ୍ଟ୍ରିପରେ ଶହୀଦଙ୍କ ଫଟୋ ଚିତ୍ରରେ ପୁଷ୍ପମାଲ୍ୟ ପ୍ରଦାନ କରିଛନ୍ତି ସ୍କୁଲ ଓ କଲେଜ ଛାତ୍ରଛାତ୍ରୀ । ଅନ୍ୟପକ୍ଷରେ ଏହି ସ୍ମୃତିସଭାରେ ପ୍ରଥମ ଥର ପାଇଁ ଯୋଗ ଦେଇଛନ୍ତି ଭାରତୀୟ ବାୟୁସେନାର ଅଧିକାରୀ ଶଶୀ ଆରର । ଦ୍ବିତୀୟ ବିଶ୍ଵଯୁଦ୍ଧ ସମୟରେ ଅମରଦା ଏୟାର ଷ୍ଟ୍ରିପରେ ଘଟିଥିବା ଘଟଣାବଳୀକୁ ନେଇ ଭାରତୀୟ ବାୟୁସେନା ଓ ଇତିହାସ ଗବେଷକ ଅନିଲ ଧିର ଖୁବଶୀଘ୍ର ଏହି ଏୟାର ଷ୍ଟ୍ରିପରେ ନିର୍ମାଣ କରିବାକୁ ଯାଉଛନ୍ତି ଶାନ୍ତି ମ୍ୟୁଜିଅମ । ଯାହା ପୁରା ଭାରତ ବର୍ଷରେ ବିରଳ ହେବ ବୋଲି ଦାବି କରିଛନ୍ତି ସମାଜସେବୀ ଆଦିତ୍ୟ ପଟ୍ଟନାୟକ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
