ବାରିପଦା: କଳା ସଂସ୍କୃତିର ଜିଲ୍ଲା ମୟୂରଭଞ୍ଜ । କଳା ଓ ସଂସ୍କୃତିକୁ ବଞ୍ଚାଇବା ପାଇଁ ବାରିପଦାରେ ବିଗତ 4 ବର୍ଷ ହେବ ଆରମ୍ଭ ହୋଇଛି ମୟୂରଭଞ୍ଜ ମହୋତ୍ସବ । ନଭେମ୍ବର 25 ଠାରୁ ଆରମ୍ଭ ହୋଇ ଡିସେମ୍ବର 1 ତାରିଖ ପର୍ଯ୍ୟନ୍ତ ଚାଲିବ ଏହି ମହୋତ୍ସବ । ଏନେଇ ସୋମବାର ଶ୍ରୀ ହରିବଳଦେବଜୀଉ ମନ୍ଦିର ନିକଟରେ ମୟୂରଭଞ୍ଜ ମହୋତ୍ସବର ଉଦଘାଟନୀ ଉତ୍ସବ ଅନୁଷ୍ଠିତ ହୋଇଯାଇଛି ।
ଏହି ଅବସରରେ ଜିଲ୍ଲାପାଳ ଭିନିତ ଭରଦ୍ବାଜ ଓ ଏସପି ପରମାର ସ୍ମିଥ ପୁରୁଷୋତ୍ତମ ଦାସ ପତାକା ଦେଖାଇ ମୟୂରଭଞ୍ଜ ମହୋତ୍ସବକୁ ଶୁଭାରମ୍ଭ କରିଥିଲେ । ଏହି ଅବସରରେ ମୟୂରଭଞ୍ଜ ଜିଲ୍ଲାର ବିଭିନ୍ନ ପାରମ୍ପରିକ ନୃତ୍ୟ ଗୀତର ଏକ ବିରାଟ ରାଲି ଶ୍ରୀ ହରିବଳଦେବ ଜୀଉ ମନ୍ଦିର ନିକଟରୁ ବାହାରି ବାରିପଦାର ଛଉ ପଡିଆ ପର୍ଯ୍ୟନ୍ତ ଯାଇଥିଲା । ଏହି ମହୋତ୍ସବ ଆସନ୍ତା ଡିସେମ୍ବର 1 ପର୍ଯ୍ୟନ୍ତ ଛଉ ପଡିଆ ଠାରେ ଅନୁଷ୍ଠିତ ହେବ ।
ଏହି ଉଦଘାଟନୀ ଉତ୍ସବରେ ଓଲିଉଡ କଳାକାର ଅସିତ ପତିଙ୍କ ସହ ଅଭିନେତା ଉତ୍ତମ ମହାନ୍ତି ମଧ୍ୟ ଉପସ୍ଥିତ ଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
