ବାରିପଦା: ରାଜ୍ୟରେ ଦିନକୁ ଦିନ ବିଗୁଡୁଛି କୋରୋନା ସ୍ଥିତି । ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟାରେ ମୟୂରଭଞ୍ଜ ଜିଲ୍ଲା ସପ୍ତମ ସ୍ଥାନରେ ରହିଛି । ବର୍ତ୍ତମାନ ସୁଦ୍ଧା ମୋଟ ସଂକ୍ରମିତଙ୍କ ସଂଖ୍ୟା ୧୮୫୯୭ରେ ପହଞ୍ଚିଛି । ମୋଟ ୧୯୫୩ ଜଣ ଆକ୍ରାନ୍ତ ସକ୍ରିୟ ଅଛନ୍ତି । ଏଭଳି ସ୍ଥିତିରେ ମୟୂରଭଞ୍ଜ ଜିଲ୍ଲାବାସୀଙ୍କ ପାଇଁ ବାର୍ତ୍ତା ଦେଇଛନ୍ତି ଜିଲ୍ଲାପାଳ ।
ମୟୂରଭଞ୍ଜ ଜିଲ୍ଲାପାଳ ଭିନିତ ଭରଦ୍ୱାଜ ଜିଲ୍ଲାବାସୀଙ୍କୁ ଭୟଭୀତ ନହେବା ପାଇଁ କହିବା ସହ ଜିଲ୍ଲାରେ କୋଭିଡ ରୋଗୀଙ୍କ ଚିକିତ୍ସା ପାଇଁ ସମସ୍ତ ପ୍ରକାର ବ୍ୟବସ୍ଥା ରହିଛି ବୋଲି କହିଛନ୍ତି । ଜିଲ୍ଲାରେ କୋଭିଡ ୧୯କୁ ମୁକାବିଲା କରିବା ପାଇଁ ପର୍ଯ୍ୟାପ୍ତ ପରିମାଣରେ ଅକ୍ସିଜେନ, କୋଭିଡ ରୋଗୀଙ୍କ ପାଇଁ ବେଡ଼ ଓ ଭେଣ୍ଟିଲେଟରର ବ୍ୟବସ୍ଥା ରହିଛି । ଅନ୍ୟପକ୍ଷରେ ଦ୍ବିତୀୟ ଲହର କୋରୋନା ମହାମାରୀକୁ ରୋକିବା ପାଇଁ ମାସ୍କ ପିନ୍ଧିବା ସହ ଲକଡାଉନ ସମୟରେ ଅଯଥାରେ ଘରୁ ନବାହାରିବା ପାଇଁ ନିବେଦନ କରିଛନ୍ତି ଜିଲ୍ଲାପାଳ । କୌଣସି ଜରୁରୀ କାମରେ ଘରୁ ବାହାରିଲେ ଅଯଥା ଗହଳି ନକରି ସାମାଜିକ ଦୂରୁତ୍ବ ବଜାୟ ରଖିବା ସହ ମାସ୍କ ପିନ୍ଧି ନିଜ କାର୍ଯ୍ୟ ସମ୍ପାଦନ କରନ୍ତୁ ବୋଲି କହିଛନ୍ତି ଜିଲ୍ଲାପାଳ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
