ବିଦ୍ୟୁତ ସଂସ୍ପର୍ଶରେ ଆସି ଯୁବକ ମୃତ

ଘରେ କେହି ନଥିବା ବେଳେ ଜଣେ ଯୁବକ ବିଦ୍ୟୁତ ଖୁଣ୍ଟରୁ ଖସି ଯାଇଥିବା ଘରର ସରଭିସ୍ ତାରକୁ ଲଗାଉଥିଲେ । ଏହି ସମୟରେ ବିଦ୍ୟୁତ ତାର ସଂସ୍ପର୍ଶରେ ଆସି ପ୍ରାଣ ହରାଇଛନ୍ତି । ଏଭଳି ଅଭବାନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଅଧିନସ୍ଥ ବରାଜିଆଣି ଗାଁରେ ।

ରାଇରଙ୍ଗପୁର: ବିଦ୍ୟୁତ ଆଘାତରେ ଗଲା ଯୁବକଙ୍କ ଜୀବନ । ଏପରି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧିନ ବରାଜିଆଣି ଗାଁରେ । ମୃତ ଯୁବକ ଜଣକ ଭାଦୁ ହେମ୍ବ୍ରମଙ୍କ ପୁଅ ଅର୍ଜୁନ ହେମ୍ବ୍ରମ(୨୭)।

ସୂଚନା ଅନୁଯାୟୀ ଘରେ କେହି ନଥିବା ସମୟରେ ଅର୍ଜୁନ ବିଦ୍ୟୁତ ଖୁଣ୍ଟରୁ ଖସି ଯାଇଥିବା ଘରର ସରଭିସ୍ ତାରକୁ ଲଗାଉଥିଲେ । ସେହି ସମୟରେ ବିଦ୍ୟୁତ ସଂସ୍ପର୍ଶରେ ଆସି ସେ ବିଦ୍ୟୁତ ଆଘାତ ପାଇ ସେଠାରେ ଚେତାଶୂନ୍ୟ ଅବସ୍ଥାରେ ପଡିରହିଥିଲେ । ପଡୋଶୀମାନେ ତୁରନ୍ତ ତାଙ୍କ ସ୍ତ୍ରୀ ଓ ବାପାଙ୍କୁ ଡାକି ଏକ ଗାଡ଼ି ଯୋଗେ ରାଇରଙ୍ଗପୁର ଡାକ୍ତରଖାନା ଆଣିଥିଲେ ।

ମେଡିକାଲରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ମୃତକଙ୍କ ସ୍ତ୍ରୀ ଓ ଦୁଇଟି ଛୋଟ ଛୋଟ ଶିଶୁପୁତ୍ର ଥିବା ବେଳେ ସେମାନଙ୍କୁ କିଛି ଆର୍ଥିକ ସହାୟତା ଯୋଗାଇ ଦେବାକୁ ସାଧାରଣରେ ଦାବି ହେଉଛି । ଏନେଇ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଏକ ଅପମୃତ୍ୟୁ ମାମଲା ରୁଜୁ କରିଛି।

ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ