ରାଇରଙ୍ଗପୁର: 7ଟି ଦୋକାନର ସର୍ଟର ତାଡି ଚୋରି କରିବା ସହ ଗୋଟିଏ ବୋଲେରୋ ଗାଡି ଚୋରି ହୋଇଥିବା ଅଭିଯୋଗ ହୋଇଛି । ଏଭଳି ଅଘଟଣ ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ହାଟବାଦଡା ଅଞ୍ଚଳରେ ।
ଗୁରୁବାର ବିଳମ୍ବିତ ରାତିରେ ହାଟବାଦଡା ଫାଣ୍ଡି ଅଧିନରେ ଥିବା ହାଟବାଦଡା ଅଞ୍ଚଳରେ 7ଟି ଦୋକାନ ଗୃହର ତାଲା ଭାଙ୍ଗିବା ସହ କବାଟ ତାଡି ଚୋରି ହୋଇଥିବା ଅଭିଯୋଗ ହୋଇଛି । ଏଥିସହିତ ଏକ ବୋଲେରୋ ଗାଡ଼ି ମଧ୍ୟ ଚୋରି ହୋଇଛି । ତେବେ 7ଟି ଦୋକାନର କବାଟ ଲୁଟେରା ତାଡ଼ି ଥିବାବେଳେ 3ଟି ଦୋକାନରୁ ଲକ୍ଷାଧିକ ଟଙ୍କା ସହ ଦୋକାନ ସାମଗ୍ରୀ ଚୋରି କରିଛନ୍ତି ।
ଲୁଟେରା ଦଳ ହାଟବାଦଡା ଅଞ୍ଚଳର ଅନୀଲ ମହାନ୍ତଙ୍କ ବୋଲେରୋ ଚୋରି କରି ନେଇଥିବାବେଳେ ମକରା ଦେଙ୍କ ବୋଲେରୋ ଚୋରି ଉଦ୍ୟମ କରି ବିଫଳ ହୋଇଛନ୍ତି । ଲୁଟେରା ଇଲକ୍ଟ୍ରୋନିକ୍ସ ଦୋକାନ, ଗ୍ରୋସରୀ ଦୋକାନ, ଲୁଗା ଦୋକାନ, ଫଟୋ ଷ୍ଟୁଡିଓ, ପାନ ଦୋକାନ ଓ ଚାହା ଦୋକାନ ଆଦିରୁ ଚୋରି କରିଛନ୍ତି। ଘଟଣାକୁ ନେଇ ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଛାନଭିନ ଆରମ୍ଭ କରିଛି।
ସେପଟେ ବାରମ୍ବାର ଉକ୍ତ ଅଞ୍ଚଳରେ ଚୋରି ଘଟଣା ବୃଦ୍ଧି ପାଉଥିବାରୁ ସ୍ଥାନୀୟ ଲୋକେ ପୋଲିସର କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ଉଠାଇଛନ୍ତି। ଖୁବ୍ ଶୀଘ୍ର ଲୁଟେରାଙ୍କୁ ଗିରଫ ଦାବିରେ ହାଟବାଦଡା ଦେଇ ଯାଇଥିବା ୨୨୦ନଂ ରାଞ୍ଚି ବିଜୟୱାଡା ଜାତୀୟ ରାଜପଥ ଅବରୋଧ କରିଛନ୍ତି । ଫଳରେ ରାଇରଙ୍ଗପୁର କରଞ୍ଜିଆ ଯାତାୟାତ ଠପ୍ ହୋଇଛି । ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
