ରାଇରଙ୍ଗପୁର: ଅଧ୍ୟାପିକାଙ୍କ ଆତ୍ମହତ୍ୟା ମାମଲାରେ ନୂଆ ମୋଡ଼। ଭାଉଜଙ୍କ ଶଇତାନ ଭାଇ ଦ୍ବାରା ଦୁଷ୍କର୍ମର ଶିକାର ପରେ ଅଧ୍ୟାପିକା ଆତ୍ମହତ୍ୟା କରିଥିବା ସନ୍ଦେହ କରାଯାଉଥିଲା। କିନ୍ତୁ ବର୍ତ୍ତମାନ ଅଧ୍ୟାପିକାଙ୍କ ବାପା ଏହାକୁ ହତ୍ୟା କହିଛନ୍ତି ।
ତେବେ ପ୍ରକାଶ ଥାଉକି ଅଧ୍ୟାପିକାଙ୍କ ଲିଖିତ ଅଭିଯୋଗ ମୁତାବକ, ଗତ ଅକ୍ଟୋବର ୩୦ ତାରିଖରେ ତାଙ୍କ କକା ପୁଅଙ୍କ ସ୍ତ୍ରୀ ମିନ୍ମୟୀ ସାହୁ (ଭାଉଜ )ଫୋନ ଯୋଗେ ତାଙ୍କୁ କେନ୍ଦୁଝରକୁ ବୁଲିବାକୁ ଡାକିଥିଲେ । ଭାଉଜଙ୍କ କଥାକୁ କାଟିନପାରି ସେ ବସରେ କେନ୍ଦୁଝର ଯାଇ ଭାଉଜଙ୍କ ଘରେ ରହିଥିଲେ ଏବଂ ରାତିରେ ଏକା ଶୋଇଥିବା ଅବସ୍ଥାରେ ଭାଉଜଙ୍କ ଭାଇ ସୌମ୍ୟରଂଜନ ସାହୁ ତାଙ୍କ ସହ ଦୁଷ୍କର୍ମ କରିଥିଲେ । ଏହାପରେ କାହାକୁ କିଛି ନକହିବାକୁ ଧମକ ମଧ୍ୟ ଦେଇଥିଲେ ।
ଯାହାକୁ ନେଇ ଝାରପୋଖରିଆ ଥାନାରେ ଏକ ମାମଲା ରୁଜୁ କରି ଅଧ୍ୟାପିକାଙ୍କୁ ଡାକ୍ତରୀମାଇନା ପାଇଁ PRM ମେଡିକାଲ କଲେଜକୁ ପଠାଯିବା ସହିତ ମାଜିଷ୍ଟ୍ରେଟଙ୍କଠାରେ ତାଙ୍କ ବୟାନ ରେକର୍ଡ କରାଯାଇଥିଲା। କିନ୍ତୁ ଝାରପୋଖରିଆ ପୋଲିସ ଅଭିଯୁକ୍ତକୁ ଆଜି ପର୍ଯ୍ୟନ୍ତ ଗିରଫ କରି ନଥିବା ଜଣାପଡିଛି।
ଅନୁମାନ କରାଯାଉଛି ଯେ ଏପରି କାଣ୍ଡ ପରେ ନିଜର ମାନସିକ ଭାରସାମ୍ୟ ହରାଇ ଅଧ୍ୟାପିକା ଜଣକ ଏପରି କରିଥାଇ ପାରନ୍ତି। ସେପଟେ ମୃତ ଅଧ୍ୟାପିକାଙ୍କ ବାପା ଝିଅକୁ ହତ୍ୟା କରାଯାଇଥିବା ନେଇ ଅଭିଯୋଗ କରିଛନ୍ତି। ଅନ୍ୟପଟେ ମୃତ ଅଧ୍ୟାପିକାଙ୍କ କକା ତାଙ୍କ ଝିଆରୀର ସୁଇସାଇଡ ନୋଟ୍ ପୋଲିସ ଦେଖାଉ ନଥିବା ଅଭିଯୋଗ ଆଣିଛନ୍ତି ।
ବିଶେଷ ସୂଚନା ଅନୁଯାୟୀ, ଅଧ୍ୟାପିକାଙ୍କ ଆତ୍ମହତ୍ୟା ପରେ ମୟୂରଭଞ୍ଜ ଏସପି ପରମାର ସ୍ମିଥ ପୁରୁଷୋତ୍ତମ ଦାସ ତଦନ୍ତ ଅଧିକାରୀ ପ୍ରଶାନ୍ତ ସ୍ବାଇଁଙ୍କୁ ନିଲମ୍ବନ କରିଥିବା ବେଳେ ଝାରପୋଖରିଆ ଥାନା ଅଧିକାରୀ ଶରତ ମହାଳିକଙ୍କୁ ବାରିପଦା ହେଡ ଅଫିସକୁ ବଦଳି କରାଇଛନ୍ତି । ଏଥିସହ ତିରିଂ ଥାନା ଆଇଆଇସି ସୁଦର୍ଶନ ଗାଙ୍ଗଇଙ୍କୁ ଝାରପୋଖରିଆ ଥାନାଧିକାରୀ ଭାବେ ରବିବାର ସକାଳ ୬ଟାରେ ନିଯୁକ୍ତ କରାଯାଇଥିବା ଜଣାପଡିଛି । ତେବେ ଦେଖିବା ପାଇଁ ବାକି ରହିଲା ବର୍ତ୍ତମାନ ଏହି ଘଟଣା କେଉଁ ମୋଡ ନେଉଛି ।
ପ୍ରକାଶ ଥାଉକି, ରବିବାର ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଟାଉନ ଥାନା ଅଧିନ ରାଇରଙ୍ଗପୁର ମହାବିଦ୍ୟାଳୟ ଛାତ୍ରୀ ନିବାସରୁ କଣ୍ଟ୍ରାକ୍ଟଚୁଆଲ ଫିଜିକ୍ସ ଅଧ୍ୟାପିକା ରୁକ୍ମଣୀ ମଣ୍ଡଳ ଝୁଲନ୍ତା ମୃତଦେହ ଉଦ୍ଧାର ହୋଇଛି ।
ରାଇରଙ୍ଗପୁରରୁ ସଞ୍ଜୟ ପରିଡ଼ା, ଇଟିଭି ଭାରତ
