ବାରିପଦା: ମନ୍ଦିରରୁ ଲୁଟ । ଲୁଟେରାଙ୍କ ନଜର ଏବେ ମନ୍ଦିର ଉପରେ । ଗତ ୩ଦିନ ମଧ୍ୟରେ ମୟୂରଭଞ୍ଜ ରାସଗୋବିନ୍ଦପୁର ଥାନା ଅଧିନସ୍ଥ କମାରଡିହା ଏବଂ ତୋଟାପଡା ଅଞ୍ଚଳର ୫ଟି ମନ୍ଦିରରୁ ଲକ୍ଷାଧିକ ଟଙ୍କାର ସୁନାଗହଣା ଚୋରି ହୋଇଥିବା ଜଣାପଡିଛି ।
ଗତ ଶନିବାର ରାତିରେ କମାରଡିହା ରଥ ପଡିଆ ନିକଟରେ ଥିବା ହନୁମାନ ମନ୍ଦିରର ଗ୍ରିଲ ଭାଙ୍ଗି ହନୁମାନ ମନ୍ଦିରରେ ଥିବା ପୂଜା ସାମଗ୍ରୀ ସମେତ ପ୍ରାୟ ୨୦ହଜାର ଟଙ୍କାର ସୁନା, ରୂପା ଗହଣା ଚୋରି କରିଥିଲେ ଦୁର୍ବୃତ୍ତ । ସେହି ରାତିରେ ଉକ୍ତ ଗ୍ରାମର ରାଧାଶ୍ୟାମ ପଣ୍ଡାଙ୍କ ଘରେ ଥବା ଲକ୍ଷ୍ମୀନାରାୟଣ ମନ୍ଦିରର ତାଲାଭାଙ୍ଗି ମଧ୍ୟ ଆନୁମାନିକ ୧ଲକ୍ଷ ୫0ହଜାର ଟଙ୍କାର ଅଳଙ୍କାର ଚୋରି ହୋଇଥିଲା । ସକାଳେ ଚୋରି ହୋଇଥିବା ଜଣାପଡିବା ପରେ କମାରଡିହା ଅଞ୍ଚଳର କିଛି ଲୋକ ବସ୍ତା ରେଳଷ୍ଟେସନ ସଂରକ୍ଷିତ ପଟାସ ଜଙ୍ଗଲରେ ରହୁଥିବା ବାରବୁଲା ଲୋକଙ୍କୁ ସନ୍ଦେହ କରି ପଚରାଉଚୁରା କରିବା ପରେ ସେମାନଙ୍କ ନିକଟରୁ କିଛି ଚୋରି ସାମଗ୍ରୀ ଉଦ୍ଧାର କରାଯାଇଥିଲା । ପୋଲିସ ଘଟଣାସ୍ଥଳରେ ପହଞ୍ଚି ଘଟଣାରେ ଜଡିତ ଥିବା କିଛି ଲୋକଙ୍କୁ ମଧ୍ୟ ଗିରଫ କରିଥିଲା ।
ଏହି ଘଟଣା ଘଟିବାର ଦୁଇଦିନ ନଯାଉଣୁ ଗତକାଲି(ମଙ୍ଗଳବାର) ରାତିରେ ତୋଟାପଡା ପଞ୍ଚାୟତ ପାଇକ ସାହି ଠାରେ ଥିବା ମା ସନ୍ତୋଷୀ, ଶ୍ରୀ ଚୈତନ୍ୟଦେବ ଏବଂ ମା ତାରିଣୀଙ୍କ ମନ୍ଦିରରୁ ପ୍ରାୟ ୫ଲକ୍ଷ ଟଙ୍କାର ସାମଗ୍ରୀ ଓ ସୁନାଗହଣା ଚୋରି ହୋଇଥିବା ଜଣାପଡିଛି । ଏହା ପୋଲିସ ପାଇଁ ମୁଣ୍ତବ୍ୟଥାର କାରଣ ପାଲଟିଥିବାବେଳେ ସାଧାରଣରେ ଅସନ୍ତୋଷ ବୃଦ୍ଧି ପାଇବାରେ ଲାଗିଛି ।
ଖବର ପାଇ ବେତନଟି ଉପଖଣ୍ଡ ଅଧିକାରୀ ଗୋବିନ୍ଦ ସେଠୀ ଥାନା ଆଇଆଇସି ରେଣୁବାଳା ସାହୁ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ବାହାର ରାଜ୍ୟରୁ ମୟୂରଭଞ୍ଜ ଜିଲ୍ଲାକୁ ବାରବୁଲାଙ୍କ ସମେତ ଫେରିବାଲା ତଥା କାମ କରିବା ପାଇଁ ଆସୁଛନ୍ତି । ଆଉ ଏଠାରେ ନାନା ପ୍ରକାର ଅସାମାଜିକ କାର୍ଯ୍ୟରେ ଲିପ୍ତ ରହୁଥିଲେ ମଧ୍ୟ ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନଥିବାରୁ ସାଧାରଣରେ ଅସନ୍ତୋଷ ଦେଖାଦେଇଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
