ରାଇରଙ୍ଗପୁର: କଲେଜ ପ୍ରିନ୍ସପାଲଙ୍କ ନାଁରେ ସାଂଘାତିକ ଅଭିଯୋଗ । ବିଳମ୍ବିତ ରାତିରେ ଅଧ୍ୟାପିକାମାନଙ୍କୁ କରୁଥିଲେ ମେସେଜ । ମାନସିକ ନିର୍ଯ୍ୟାତନା ଓ ଧମକ ଚମକ ଦେଉଥିବାର ଅଭିଯୋଗ ଆଣିଲେ କଲେଜ ଅଧ୍ୟାପିକା । ଏପରି କିଛି ଅଭାବନୀୟ ଘଟଣା ମୟୂରଭଞ୍ଜ ଜିଲ୍ଲାର ସଦରମହକୁମା ବାରିପଦାରୁ ସାମ୍ନାକୁ ଆସିଛି । ବାରିପଦା ସହର ସ୍ଥିତ ଏମପିସି ଜୁନିଅର କଲେଜର ଅଧ୍ୟାପିକାମାନେ ଉକ୍ତ କଲେଜର ଅଧ୍ୟକ୍ଷ ଶୁଭଙ୍କର ସାହୁଙ୍କ ନାଁରେ ବାରିପଦା ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି ।
ଅଧ୍ୟାପିକାମାନଙ୍କ ଅଭିଯୋଗ ଅନୁଯାୟୀ, ଦୀର୍ଘ ଦିନ ଧରି ଅଧ୍ୟାପିକାମାନେ ବାରିପଦା ସହର ସ୍ଥିତ ଏମପିସି ଜୁନିଅର କଲେଜରେ ଶିକ୍ଷାଦାନ କରି ଆସୁଛନ୍ତି । ଉକ୍ତ ଅଧ୍ୟାପିକାମାନଙ୍କୁ କଲେଜର ଅଧ୍ୟକ୍ଷ ଶୁଭଙ୍କର ସାହୁ ମାନସିକ ନିର୍ଯ୍ୟାତନା ଦେଉଛନ୍ତି । ସେମାନଙ୍କୁ ଦୁର୍ବ୍ୟବହାର କରୁଥିବା ସହ ଅଧ୍ୟକ୍ଷଙ୍କ କଥା ନମାନିଲେ ଖରାପ ବ୍ୟବହାର କରିବା ସହିତ ବିଳମ୍ବିତ ରାତିରେ କଲେଜ ଅଧ୍ୟକ୍ଷ ଫୋନ ଯୋଗେ ଅଧ୍ୟାପିକା ମାନଙ୍କୁ ମେସେଜ କରୁଛନ୍ତି । ଅଧ୍ୟାପିକାମାନଙ୍କୁ ବିନା କାରଣରେ ଅଫିସ ଚ୍ୟାମ୍ବରରେ ବସିବାକୁ ବାଧ୍ୟ କରିଥାନ୍ତି ଏବଂ ସଠିକ ପାଠ ଜାଣିନଥିବା ବେଳେ କିପରି ଅଧ୍ୟାପିକାମାନେ ଚାକିରୀ ପାଇଛନ୍ତି ବୋଲି ପ୍ରଶ୍ନ କରନ୍ତି ଅଧ୍ୟକ୍ଷ । ଏପରି କି ଜାତିଆଣରେ ଆକ୍ଷେପ କରି ଅଧ୍ୟାପିକାମାନଙ୍କୁ ଗାଳିଗୁଲଜ କରିବା ଓ କ୍ୟାରିଅର ନଷ୍ଟ କରିଦେବାର ଧମକ ଦେଉଥିବାର ଅଧ୍ୟାପିକାମାନେ ଅଭିଯୋଗ କରିଛନ୍ତି । ତେବେ ବହୁ ପୂର୍ବରୁ ଏହିପରି ହଇରାଣ ହରକତ କରୁଥିବାର ଅଭିଯୋଗ କରିଛନ୍ତି ଅଧ୍ୟାପିକା ।
ସେପଟେ ମହାମାରୀ କୋରୋନା ସମୟରେ କଲେଜକୁ ଆସିବା ପାଇଁ ଅଧ୍ୟକ୍ଷ ବାଧ୍ୟ କରୁଥିବା ଓ ଅଧ୍ୟାପିକାମାନଙ୍କୁ ବିଭିନ୍ନ ଆଳରେ ହଇରାଣ କରିବା, ବିଳମ୍ବିତ ରାତ୍ରିରେ ଆପତ୍ତିଜନକ ମେସେଜ ପଠାଇ ମାନସିକ ନିର୍ଯ୍ୟାତନା ଦେବା ଏବଂ ଜାତିଆଣ ଆକ୍ଷେପ କରି ଗାଳି ଦେବା ଭଳି ସଂଗୀନ ଅଭିଯୋଗ କରିଛନ୍ତି ଅଧ୍ୟାପିକା । ଅଧ୍ୟାପିକା ସ୍ମୃତିରେଖା ଗିରି ଓ ଅନ୍ୟ ଅଧ୍ୟାପିକାମାନେ ଏଭଳି କିଛି ଅଭିଯୋଗ କରି ବାରିପଦା ଟାଉନ ଥାନାର ଦ୍ୱାରସ୍ଥ ହୋଇଛନ୍ତି । କଲେଜ ଅଧ୍ୟକ୍ଷ ଦୀର୍ଘ ଦିନ ଧରି ଏହିପରି ବ୍ୟବହାର କରି ଆସୁଥିବା ବେଳେ ଅଧ୍ୟାପିକାମାନେ ଏସମ୍ପର୍କରେ ଉଚ୍ଚପଦସ୍ଥ ବିଭାଗୀୟ ଅଧିକାରୀଙ୍କୁ ଜଣାଇଥିଲେ । ହେଲେ ଫଳ ଶୂନ୍ୟ ରହିଥିଲା । ତେବେ ବିଭାଗୀୟ ଅଧିକାରୀମାନେ ଏଥିପ୍ରତି କର୍ଣ୍ଣପାତ ନକରିବାରୁ ଶେଷରେ ବାଧ୍ୟ ହୋଇ ଅଧ୍ୟାପିକାମାନେ ଥାନାର ଦ୍ୱାରସ୍ଥ ହୋଇଥିଲେ । ଏହା ସହିତ କଲେଜ ଅଧ୍ୟକ୍ଷଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମଧ୍ୟ ଦାବି କରାଯାଇଛି ।
ଏହା ମଧ୍ୟ ପଢ଼ନ୍ତୁ......ଛାତ୍ରୀଙ୍କୁ ଅସଦାଚରଣ ଅଭିଯୋଗରେ ଛେଚା ଖାଇଲେ ଶିକ୍ଷକ
ତେବେ ଏହି ଘଟଣାକୁ ନେଇ ବାରିପଦା ଟାଉନ ଥାନାରେ କେଶ ନମ୍ବର ୭୯୨/୨୩ରେ ଏକ ମାମଲା ରୁଜୁ କରି ପୋଲିସ ତଦନ୍ତ ଜାରି ରଖିଛି । ସେପଟେ ଅଧ୍ୟାପିକାମାନଙ୍କର ଏହି ଅଭିଯୋଗକୁ କଲେଜ ଅଧ୍ୟକ୍ଷ ଶୁଭଙ୍କର ସାହୁ ଖଣ୍ଡନ କରି ଏହା ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି । ପୂର୍ବରୁ ଏହିପରି କୌଣସି ଅଭିଯୋଗ ଉକ୍ତ କଲେଜର ଅଧ୍ୟାପିକାମାନେ କରି ନଥିବା ବେଳେ ଏହି ଅଭିଯୋଗ ସମ୍ପୂର୍ଣ୍ଣ ଭିତ୍ତିହୀନ ବୋଲି କହିଛନ୍ତି କଲେଜର ଅଧ୍ୟକ୍ଷ । ଅନ୍ୟପଟେ ବାରିପଦା ଟାଉନ ଥାନା ପୋଲିସ ଉକ୍ତ ମାମଲାକୁ ଗୁରୁତର ସହ ଗ୍ରହଣ କରିଛି । ତଦନ୍ତ ପରେ ଯଦି ପ୍ରମାଣ ମିଳେ ତେବେ କଲେଜ ଅଧ୍ୟକ୍ଷଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବାରିପଦା ଟାଉନ ଥାନା ପୋଲିସ ସୂଚନା ଦେଇଛି ।
ଇଟିଭି ଭାରତ, ମୟୂରଭଞ୍ଜ
