ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା କରଞ୍ଜିଆ ମଣ୍ଡୁଆ ଗ୍ରାମରେ ପ୍ରେମୀଯୁଗଳଙ୍କୁ ଲଣ୍ଡା କରି ମାଡ ମାରିବା ଘଟଣାରେ 4 ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଏହା ସହ ଅନ୍ୟ ଅଭିଯୁକ୍ତଙ୍କୁ ଧରିବା ପାଇଁ ଜୋରାଦାର ପ୍ରୟାସ ଆରମ୍ଭ ହୋଇଛି ।
ସୂଚନା ଥାଉକି, କରଞ୍ଜିଆ ମଣ୍ଡୁଆ ଗ୍ରାମରେ ପ୍ରେମୀ ଯୁଗଳଙ୍କୁ ଲଣ୍ଡା କରି ମାଡ ମାରିବା ଘଟଣାର ଭିଡିଓ ଭାଇରାଲ ହୋଇଥିଲା । ଏହି ନିନ୍ଦନୀୟ ଘଟଣା ଗଣମାଧ୍ୟମରେ ପ୍ରସାର ହେବା ପରେ ପୋଲିସ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । କଙ୍ଗାରୁ କୋର୍ଟର ଏହି ଅମାନବୀୟ ଘଟଣାରେ ୨୧ ଜଣଙ୍କ ନାଁରେ ମାମଲା ରୁଜୁ ହୋଇ ଥିବାବେଳେ ପୋଲିସ ଗତକାଲି (ସୋମବାର) ତିନି ଜଣ ଯୁବକଙ୍କୁ ଗିରଫ କରିଥିଲା । ଏହା ପରେ ରାତିରେ ଗାଁରୁ ଆଉ ଜଣେ ଯୁବକଙ୍କୁ ଗିରଫ କରିଥିଲା ପୋଲିସ । ଯାହାଙ୍କୁ ଆଜି(ମଙ୍ଗଳବାର) କୋର୍ଟ ଚାଲାଣ କରାଯାଇଛି ।
ଗିରଫ ହୋଇଥିବା 4 ଜଣ ହେଲେ ସେକ ନାସାଦ(୩୮), ସେକ ମୁସ୍ତଫା(୧୯), ସେକ ଆଶିକ୍(୨୩) ଓ ସେକ କୋଟୁ(୩୧) । ତେବେ 21 ଜଣଙ୍କ ମଧ୍ୟରୁ କିଏ କିଏ ଦୋଷୀ ସେନେଇ ପୋଲିସ ଛାନଭିନ୍ନ ଜାରି ରଖିଛି ।
ରାଇରଙ୍ଗପୁର ସଞ୍ଜୟ କୁମାର ପରିଡା, ଇଟିଭି ଭାରତ
