ରାଇରଙ୍ଗପୁର: ଫେସବୁକରୁ ଆରମ୍ଭ ହେଲା ଫ୍ରେଣ୍ଡସିପ ଆଉ ତାପରେ ଗଢିଉଠିଥିଲା ପ୍ରେମ ସମ୍ପର୍କ । କିନ୍ତୁ ଏହି ପ୍ରେମ ହେଲା କାଳ । ଯୁବତୀଙ୍କୁ ବିବାହର ମିଛ ପ୍ରତିଶ୍ରୁତି ଦେଇ ଦୁଷ୍କର୍ମ କରି ପ୍ରେମିକ ଗିରଫ । ଏଭଳି ଏକ ଲଜ୍ଜା ଜନକ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଧୀନରେ ଥିବା ଘୋଡାଡେଗା ଗାଁରେ ।
ଅଭିଯୁକ୍ତ ପ୍ରେମିକ ଜଣକ ଆଇଆରବି କନଷ୍ଟେବଳ ଭାବେ ଦେଓଗଡ଼ ପମ୍ପାଡରେ କାର୍ଯ୍ୟରତ ଥିବା ଅଜୟ କୁମାର ଟୁଡୁ । ଅଜୟର ଘର ମୟୁରଭଞ୍ଜ ଜିଲ୍ଲା ବାଦାମପାହାଡ ଥାନା ଜାମୁଡିହି ଗାଁରେ । ତେବେ ଯୁବତୀଙ୍କ ପରିବାର ଲୋକେ ଅଜୟକୁ ଧରି ପୋଲିସର ଜିମା ଦେଇଥିଲେ ।
ସୂଚନାନୂଯାୟୀ, ଅଜୟ ଟୁଡୁ ଜଣେ ବିବାହିତ ହୋଇ ମଧ୍ୟ ଫେସବୁକ ମାଧ୍ୟମରେ ଘୋଡାଡେଗା ଗାଁର ଜନୈକ ଯୁବତୀଙ୍କ ସହ ପ୍ରେମ ସମ୍ପର୍କ ରଖଥିଲେ । ଅଜୟ ଉକ୍ତ ଯୁବତୀଙ୍କୁ ବିବାହର ମିଥ୍ୟା ପ୍ରତିଶୃତି ଦେଇ ଯୁବତୀଙ୍କ ଗାଁକୁ ଆସି ତାଙ୍କ ସହିତ ଦୁଷ୍କର୍ମ କରିଥିଲେ । ତେବେ ଯୁବତୀଙ୍କ ପରିବାର ଲୋକେ ଏହା ଜାଣିବା ପରେ ଥାନାରେ ଅଭିଯୋଗ କରିଥିଲେ। ଅଭିଯୋଗ ଅନୂଯାୟୀ, ରାଇରଙ୍ଗପୁର ଗ୍ରାମାଞ୍ଚଳ ପୋଲିସ ଅଭିଯୁକ୍ତ କନଷ୍ଟେବଳ ଅଜୟ ଟୁଡୁକୁ ଗିରଫ କରିଥିଲା ।
ଦଫା ୪୫୦, ୩୭୬, ୫୦୬, ୩୪ ଆଇପିସି ମୂଳେ ୩୬/୧୯ ମାମଲା ରୁଜୁ କରି ଅଜୟକୁ କୋର୍ଟ ଚାଲାଣ କରାଯାଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
