ବାରିପଦା: ମୟୂରଭଞ୍ଜ ଶିମିଳିପାଳ ଅଭୟାରଣ୍ୟରୁ ବନ୍ଧାହେଲା ଦୁର୍ଦ୍ଦାନ୍ତ ଶିକାରୀ ବାଇଗ ହୋ । ଶିମିଳିପାଳ ଅଭୟାରଣ୍ୟ ଜେନା ବିଲ ରେଞ୍ଜ ଚୌଧୁରୀଗଡ଼ ବିଟ ଅନ୍ତର୍ଗତ ଅନନ୍ତପୁର ଜଙ୍ଗଲରେ ବାଇଗ ହୋକୁ ବନବିଭାଗ କର୍ମଚାରୀ ଗୁଳି ଭର୍ତ୍ତି ଦେଶୀ ବନ୍ଧୁକ ସହ ଗିରଫ କରିଛନ୍ତି । ତା’ ଠାରୁ ଚାରିଟି ରଙ୍ଗର ବାରୁଦ ଏବଂ ୧୨୯୯ଟି ଦେଶୀ ଗୁଳି ସହ ବନ୍ଧୁକ ଜବତ କରାଯାଇଛି ।
ବାଇଗ ସହ ଅନ୍ୟ ୫ଜଣ ଶିକାରୀ ଘଟଣାସ୍ଥଳରୁ ଚମ୍ପଟ ମାରୁଥିବା ସମୟରେ ବେଳେ ବନକର୍ମଚାରୀ ମାନେ ତାଙ୍କୁ ମାଡି ବସିଥିଲେ। ବାଇଗ ହୋକୁ କାବୁ କରିଥିବା ବେଳେ ଅନ୍ୟ ଶିକାରୀ କୌଶଳ କ୍ରମେ ଚକମା ଦେଇ ଚମ୍ପଟ ମାରିଥିଲେ । ବାଇଗକୁ ବୁଧବାର ଉଦଳା ଏସଡିଜିଏମ କୋର୍ଟରେ ହାଜର କରାଯାଇଛି । ପଚାରଉଚୁରା ବେଳେ ଶିକାର ଏବଂ ବନ୍ଧୁକ ସମ୍ବନ୍ଧିତ ଅନେକ ତଥ୍ୟ ବନବିଭାଗକୁ ମିଳିଛି ।
ଏ ସମ୍ପର୍କରେ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପର କ୍ଷେତ୍ର ନିର୍ଦ୍ଦେଶକ ଟି. ଅଶୋକ କୁମାର କହିଛନ୍ତି, ''ଗତ 25 ତାରିଖ ରାତିରେ ଶିମିଳିପାଳର ବନବିଭାଗ କର୍ମଚାରୀର ନାଇଟ ପାଟ୍ରୋଲିଂ କରୁଥିବା ବେଳେ ଦୁର୍ଦ୍ଦାନ୍ତ ଶିକାରୀ ବାଇଗ ହୋକୁ କାବୁ କରିଥିଲେ । ଏହାସହ ବାଇଗ ହାତରୁ 13ଶହରୁ ଅଧିକ ବୁଲେଟ ଜବତ କରିଛି ବନବିଭାଗ କର୍ମଚାରୀ । ତେବେ ବାଇଗ ହୋ ଶିମିଳିପାଳର ନିଷିଦ୍ଧାଞ୍ଚଳରେ ବୁଲି ବନ୍ୟଜନ୍ତୁ ଶିକାର କରିବା ପାଇଁ ପ୍ରସ୍ତୁତ ହେଉଥିବା ବେଳେ ବନବିଭାଗ କର୍ମଚାରୀ ତାକୁ କାବୁ କରିଥିଲେ । ଏନେଇ ଏକ ମାମଲା ରୁଜୁ କରାଯାଇ ତାକୁ କୋର୍ଟ ଚାଲାଣ କରାଯାଇଛି । ତେବେ ଶିକାରୀ ଶିକାର କରିବା ପୂର୍ବରୁ ତାକୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ।''
ଇଟିଭି ଭାରତ, ମୟୂରଭଞ୍ଜ
