ରାଇରଙ୍ଗପୁର: ବନ୍ୟାଜଳରେ ଭାସିଯାଇ ଓଲଟିଲା ଟ୍ରକ, ଡ୍ରାଇଭର ମୃତ୍ୟୁ । ଏଭଳି ଅଭାବନୀୟ ଘଟଣା ମୟୂରଭଞ୍ଜ ଜିଲ୍ଲା କରଞ୍ଜିଆ ଉପଖଣ୍ଡରେ ଘଟିଛି । ଡ଼୍ରାଇଭର ଜଣକ ବନ୍ୟା ପାଣିରେ ବୁଡିଯାଇ ମୃତ୍ୟୁବରଣ କରିଛନ୍ତି ।
ହୃଦୟବିଦାରକ ଘଟଣା: ଆଖି ସାମନାରେ ଭାସିଗଲା ଟ୍ରକ, ଡ୍ରାଇଭର ମୃତ
ସୂଚନା ଅନୁଯାୟୀ ମୟୂରଭଞ୍ଜ ଜିଲ୍ଲା କରଞ୍ଜିଆ ଥାନା ଚଢେଇଭୋଳ ଫାଣ୍ଡି ଅଧିନ ଧକଟା ଗ୍ରାମ ନିକଟରେ ଥିବା ବୈତରଣୀ ନଦୀର ଶାଖା ନଦୀରେ ବନ୍ୟା ଜଳ ପ୍ରବାହିତ ହେଉଥିଲା । ଏହି ସମୟରେ ଟ୍ରକଟି ଲୋକଙ୍କ ସମ୍ମୁଖରେ ଆଖିପିଛୁଳାକେ ବନ୍ୟା ଜଳ ମଧ୍ୟରେ ରାସ୍ତା ପାର ହେଉଥିବାବେଳେ ପ୍ରଖର ସ୍ରୋତରେ ଟ୍ରକ ଭାସି ଯାଇଥିଲା । ତେବେ ଟ୍ରକଟି ପାଣି ପାଇପ ବୋଝେଇ କରି ପଶ୍ଚିମବଙ୍ଗରୁ କେନ୍ଦୁଝର ଯିବା ସମୟରେ ଘଟିଥିଲା ଦୁର୍ଘଟଣା ।
ଘଟଣାସ୍ଥଳରେ ଚଢେଇଭୋଳ ଫାଣ୍ଡି ଅଧିକାରୀ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ କରଞ୍ଜିଆ ଡାକ୍ତରଖାନା ପଠାଇଥିଲେ । ସେପଟେ ପ୍ରଖର ସ୍ରୋତ ଯୋଗୁଁ ଟ୍ରକଟିକୁ ଉଦ୍ଧାର କରାଯାଇ ନଥିବା ଜଣାପଡିଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
