ବାରିପଦା: ଥମୁନି ହାତୀ ଉପଦ୍ରବ । ସାଧାରଣ ଲୋକଙ୍କଠାରୁ ଆରମ୍ଭ କରି ଚାଷୀମାନେ ନାକେଦମ ହେଲେଣି । ଝାଡଖଣ୍ଡୀ ଦଲମା ଜଙ୍ଗଲରୁ ଆସିଥିବା ପ୍ରାୟ ୭୦ରୁ ଊର୍ଦ୍ଧ୍ବ ହାତୀ ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ରେଞ୍ଜ ଏବଂ ବେତନଟୀ ରେଞ୍ଜରେ ଉତ୍ପାତ ଜାରି ରଖିଛନ୍ତି । ଏନେଇ ଚିନ୍ତାରେ ଗ୍ରାମବାସୀ । ଗତ ଦୁଇ ମାସ ମଧ୍ୟରେ ଚାଷୀଙ୍କ ବହୁ ଫସଲ ନଷ୍ଟ କରିଛନ୍ତି ହାତୀ । ଏହାର କ୍ଷତିପୂରଣ ଆଶାରେ ଚାଷୀ ।
ସୂଚନା ଅନୁସାରେ ହାତୀ ପାଇଁ ଉକ୍ତ ଅଞ୍ଚଳରେ ଘନ ଘନ ବିଦ୍ୟୁତ ସରବରାହ ବନ୍ଦ ରହିଥିବା ବେଳେ ରାତିରେ ଅନିଦ୍ରା ହୋଇ ହାତୀ ଘଉଡାଇବା କାର୍ଯ୍ୟରେ ରହୁଛନ୍ତି ଅଞ୍ଚଳବାସୀ । ଦିନବେଳା ହାତୀ ଜଙ୍ଗଲରେ ରହୁଥିବା ବେଳେ ରାତିରେ ଚାଷ ଜମିରେ ପଶି ଦଳିଚକଟି ଦେଉଛି ଚାଷୀଙ୍କ ସୁନାର ଫସଲ । ଯେଉଁଥିପାଇଁ ଚିନ୍ତାରେ ଚାଷୀ । ମୟୂରଭଞ୍ଜ ଜିଲ୍ଲା ମୋରଡା, ରାସଗୋବିନ୍ଦପୁର, ଶୁଳିଆପଦା ବ୍ଲକ ଅଞ୍ଚଳରେ ଉଭୟ ଝାରଖଣ୍ଡି ଓ ଶିମିଳିପାଳ ଅଭୟାରଣ୍ୟରୁ ଆସିଥିବା ଶହେରୁ ଊର୍ଦ୍ଧ୍ବ ହାତୀ ଏବେ ଚାଷୀଙ୍କ ଚାଷ ଜମିରେ ରାଜ କରୁଥିବା ବେଳେ କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ ସହାୟତା ଯୋଗାଇବାକୁ ଦାବି କରିଛନ୍ତି ଚାଷୀ ।
ଗତ ଦୁଇ ମାସରୁ ଊର୍ଦ୍ଧ ହେବ ହାତୀଙ୍କ ଉତ୍ପାତରେ ଅତିଷ୍ଠ ହେଲେଣି ଅଞ୍ଚଳବାସୀ । ସେପଟେ ବନବିଭାଗ ପକ୍ଷରୁ ହାତୀ ଘଉଡାଇବା ପାଇଁ ସ୍ବତନ୍ତ୍ର ଟିମ ନିୟୋଜିତ ହୋଇଥିବା କହିଛନ୍ତି ବାରିପଦା ବନଖଣ୍ଡ ଅଧିକାରୀ । ତେବେ ହାତୀ ଦ୍ବାରା କ୍ଷତିଗ୍ରସ୍ତ ହିତାଧିକାରୀଙ୍କୁ ଗତ ଦୁଇ ବର୍ଷ ହେବ ମିଳିନି କ୍ଷତିପୂରଣ । ଅନ୍ୟପକ୍ଷରେ କ୍ଷତିଗ୍ରସ୍ତଙ୍କୁ ତୁରନ୍ତ କ୍ଷତିପୁରଣ ଯୋଗାଇ ଦିଆଯିବ ବୋଲି କହିଛନ୍ତି ବନଖଣ୍ଡ ଅଧିକାରୀ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
