ମୟୂରଭଞ୍ଜ: ଜିଲ୍ଲାରେ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଏବେ ଘୋର ସମସ୍ୟା ଦେଇ ଗତି କରୁଛି । ଡାକ୍ତର ପଦବୀ ଖାଲି ପଡ଼ିଥିବା ଯୋଗୁ ସ୍ବାସ୍ଥ୍ୟସେବା ବିପର୍ଯ୍ୟସ୍ତ । ଗୋଟିଏ ପଦରେ କହିବାକୁ ଗଲେ ସ୍ବାସ୍ଥ୍ୟସେବ ଖଣ୍ଡାଧାରରେ ଚାଲୁଛି । ଜିଲ୍ଲାର ଉଦଳା ଉପଖଣ୍ଡ ଚିକିତ୍ସାଳୟରେ ଏହାର ଚିତ୍ର ଆହୁରି ଉଦବେଗ୍ଜନିତ । ଡାକ୍ତରଙ୍କ ଅନୁପସ୍ଥିତିରେ ତାତିଛନ୍ତି ରୋଗୀଙ୍କ ସମ୍ପର୍କୀୟ । ଯାହାକୁ ନେଇ ଡାକ୍ତରଖାନାରେ ତୀବ୍ର ଉତ୍ତେଜନା ଦେଖାଦେଇଛି ।
ସୂଚନା ଅନୁସାରେ ଡାକ୍ତରଖାନାରେ ଡାକ୍ତର ବାରମ୍ବାର ଅନୁପସ୍ଥିତ ରହୁଛନ୍ତି । ଏନେଇ ରୋଗୀଙ୍କ ସଂପର୍କୀୟ ସମେତ ସ୍ଥାନୀୟ ଲୋକେ କ୍ରୋଧିତ ହୋଇଛନ୍ତି । ଗତକାଲି ରାତିରେ ଉତ୍ତ୍ୟକ୍ତ ଲେକେ ଡାକ୍ତରଖାନାର ଆଉଟଡୋର ଏବଂ ଇନଡୋରକୁ ବନ୍ଦ କରିଦେଇଥିଲେ । ଡାକ୍ତରଖାନାରେ ଚିକିତ୍ସାଧୀନ ଥିବା ରୋଗୀଙ୍କୁ ଦେଖିବା ନିମନ୍ତେ ଡାକ୍ତର ଯାଉନଥବାବେଳେ ଏ ବାବଦରେ ପଚାରି ବୁଝିବାକୁ ସମ୍ପର୍କୀୟ ଆଉଟଡୋରକୁ ଆସିଥିବାବେଳେ ସେଠାରେ ମଧ୍ୟ ଡାକ୍ତର ନଥିବା ଦେଖିବା ପରେ ଅସନ୍ତୋଷ ତୀବ୍ରରୂପ ନେଇଥିଲା । ତେବେ ୩ ଘଣ୍ଟାରୁ ଊର୍ଦ୍ଧ୍ବ ସମୟ ଧରି ଆଉଟଡୋର ଏବଂ ଇନଡୋର ବନ୍ଦ ରହିଥିବା ବେଳେ ରୋଗୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିବା ଦେଖୁବାକୁ ମିଳିଛି ।
ଏହାପରେ ସମ୍ପର୍କୀୟ ଓ ସ୍ଥାନୀୟ ଲୋକେ ଡାକ୍ତରଖାନା ପରିସରରେ ହୋ ହାଲ୍ଲା କରିଥିଲେ । ଫଳରେ ଡାକ୍ତରଖାନା ପରିସରରେ ଗଣ୍ଡଗୋଳ ଆଶଙ୍କା କରି ପୋଲିସ୍ ମୁତୟନ କରାଯାଇଛି |
ଘଟଣାସ୍ଥଳରେ ଉପଖଣ୍ଡ ଚିକିତ୍ସାଧିକାରୀ ପହଞ୍ଚି ଥିବାବେଳେ ତାଙ୍କୁ ଉତ୍ୟକ୍ତ ଲୋକେ କିଛି ସମୟ ଅଟକ ରଖିଥ୍ଲେ | ଏବେ ସୁଦ୍ଧା କୌଣସି ସମାଧାନର ରାସ୍ତା ବାହାରି ପାରିନାହିଁ । ତେବେ ଏହି ଘଟଣା ବାବଦରେ ଉପଖଣ୍ଡ ଚିକିତ୍ସାଧିକାରୀଙ୍କ କୌଣସି ପ୍ରତିକ୍ରିୟା ମିଳିପାରିନାହିଁ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
