ରାଇରଙ୍ଗପୁର: ହଜିଗଲା ମାନବିକତା । ଜମି ବିବାଦକୁ କେନ୍ଦ୍ର କରି ୨୪ ଘଣ୍ଟାରୁ ଅଧିକ ସମୟ ଧରି ପଡିରହିଲା ମୃତଦେହ । ଶେଷରେ ପୋଲିସ ଉପସ୍ଥିତିରେ ହେଲା ଅନ୍ତିମ ସତ୍କାର । ଏପରି ଏକ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ବିଶୋଇ ଥାନା ଅନ୍ତର୍ଗତ ଓଷାଡଲା ଗାଁରେ । ଯାହା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ, ଓଷାଡଲା ଗାଁର ଜନୈକା ବିଧବା ବୃଦ୍ଧା ହେଜଲ ନାଏକ (୮୫) ସ୍ବାମୀଙ୍କ ମୃତ୍ୟୁ ପରେ ଘରେ ଏକୁଟିଆ ରହୁଥିଲେ ।ବାର୍ଦ୍ଧକ୍ୟ ଜନିତ କାରଣରୁ ତାଙ୍କର ମୃତ୍ୟୁ ଘଟିଥିଲା । ତେବେ ଗ୍ରାମବାସୀଙ୍କ ସହାୟତାରେ ତାଙ୍କ ଘର କଡ଼ରେ ଅନ୍ତିମ ସତ୍କାର କାର୍ଯ୍ୟକ୍ରମ ଚାଲିଥିଲା । ହେଲେ ସେହି ଗାଁର ନାରାୟଣ ମାରାଣ୍ଡି ସେଠାରେ ତାଙ୍କ ପୈତୃକ ଜାଗା ଥିବା ଦର୍ଶାଇ ବିରୋଧ କରିବା ସହ ସେଠାରେ ସତ୍କାର କରିବା ପାଇଁ ଦେଇ ନଥିଲେ । ଏହାକୁ କେନ୍ଦ୍ର କରି ଗ୍ରାମବାସୀଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା । ତେବେ ମୃତକଙ୍କ ସମ୍ପର୍କୀୟମାନେ ଶେଷରେ ବିଶୋଇ ଥାନା ପୋଲିସକୁ ଖବର ଦେଇଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଥିଲା ।
ବିଶୋଇ ଥାନା ପୋଲିସ ନାରାୟଣଙ୍କୁ ବୁଝାଇବାରେ ବିଫଳ ହୋଇଥିଲେ । ପରେ ଓଷାଡଲା ଗାଁର ସାପ୍ତାହିକ ହାଟ ମଝିରେ ମୃତକଙ୍କ ସ୍ବାମୀଙ୍କ ନିଜସ୍ଵ ଜମି ଥିବାରୁ ସାପ୍ତାହିକ ହାଟ ମଝିରେ ହିଁ ପୋଲିସ ଉପସ୍ଥିତିରେ ସତ୍କାର କରାଯାଇଥିଲା । ସେପଟେ ସାପ୍ତାହିକ ହାଟ ଏକ ସର୍ବସାଧାରଣ ସ୍ଥାନ ହୋଇଥିବାରୁ ହାଟ ମଝିରେ ମୃତଦେହ ପୋତିବାକୁ ନେଇ ସେଠାରେ ମଧ୍ୟ କିଛି ସମୟ ପାଇଁ ବିବାଦ ସୃଷ୍ଟି ହୋଇଥିଲା।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା,ଇଟିଭି ଭାରତ
